VIKEKE, 18 Juñu 2026 (TATOLI)—Xefe Suku Makadike Uaitame, Postu Administrativu Uatulari, Munisípiu Vikeke, José Soares Pinto, informa rai nakdoko tan iha Kuarta (17/06) kontinua afeta ba foho Builó no hamosu tahu-teen iha foho okos hodi halo bee-matan sira sai fo’er hodi difikulta ba komunidade asesu bee-moos.
“Akontesimentu rai nakdoko ne’e akontese iha Postu Uatulari no Postu Ossú afeta ba foho Builó iha horisehik (17/06) kalan, ne’ebé agora hamosu tahu-teen mak sai fali iha foho okos no halo bee-matan sira sai fo’er hotu,” José Soares ba TATOLI iha foho Builó, Kinta ne’e.
Autoridade ne’e haktuir situasaun ne’e daudaun ne’e halo komunidade trauma tanba kada loron rai kontinua nakdoko no foho Builó balun mós kontinua monu ne’ebé halo komunidade la hakmatek.
“Ita haree rai nakdoko ne’e loroloron fali. Ohin lorokraik mós kontinua nakdoko. Ha’u simu informasaun husi komunidade iha Suku Makadike de Baixo katak bee ne’ebé husi bee-matan Builó ne’ebé nesesita komunidade agora sai merak tanba kauza husi rai nakdoko,” nia haktuir.
Iha sorin seluk, abitante husi Suku Matahoi, Vicente Rui Soares da Cruz, informa bee-matan sira iha foho Builó agora daudaun ne’e merak hotu.
Notísia relevante: Situasaun atuál iha foho Builó normál hikas
“Bee-matan ne’e besik iha ami-nia toos kedas ne’ebé horikalan akontese rai nakdoko ne’e bee-matan agora sai mai ne’e ita haree tahu de’it. Tan ne’e mak bee ne’ebé distribui bá Postu Uatulari Vila daudaun ne’e sai merak,” nia informa.
Iha fatin ketak, Xefe Departamentu Jestaun Risku Dezastre Naturál husi Autoridade Protesaun Sivíl (APC-silga portugeza) Munisípiu Vikeke, Eugénio Guterres, relata ohin ekipa APC bá diretamente haree mosu duni tahu iha foho okos, maibé la afeta ba komunidade ne’ebé hela besik iha foho Builó husi parte Ossú no Uatulari nian.
“Ohin ami ba haree direta mosu rai tomak mak nakfera hodi hamosu tahu no tahu nia iis ne’e sai hanesan fugaun nia iis no bee merak hotu,” nia subliña.
Nia dehan, daudaun ne’e, komunidade Aldeia Matadalan ne’ebé hela besik iha foho Builó kondisaun atuál di’ak hotu.
Tuir dadus, populasaun Aldeia Matadalan ho totál hamutuk na’in-55 ne’ebé daudaun ne’e iha foho Builó nian okos.
Fó hanoin fali katak rai-nakdoko dezde 0𝟕 𝐉𝐮ñ𝐮 𝟐𝟎𝟐𝟔, ne’ebé parte Institutu Jeosiénsia Timor-Leste (𝐈𝐆𝐓𝐋-sigla portugeza) rejista sekuénsia ida ho rai-nakdoko hitu, ho magnitude entre 𝐌𝟒.𝟎 𝐭𝐨’𝐨 𝐌𝟒.𝟕, ne’ebé konsentra iha arredór 𝐅𝐨𝐡𝐨 𝐁𝐮𝐢𝐥ó, 𝐎𝐬𝐬ú.
Iha loron 0𝟕 𝐉𝐮ñ𝐮 – M4.7 (eventu boot liu to’o agora), loron 𝟏𝟑 𝐉𝐮ñ𝐮 – M4.2, 𝟏𝟒 𝐉𝐮ñ𝐮 – M4.0, 𝟏𝟓 𝐉𝐮ñ𝐮 – M4.1, 𝟏𝟔 𝐉𝐮ñ𝐮 – M4.3, loron 𝟏𝟕 𝐉𝐮ñ𝐮 – M4.0 no loron 𝟏𝟖 𝐉𝐮ñ𝐮 – M4.4 (sente maka’as iha Vikeke).
Jornalista: Vitorino Lopes da Costa
Editór: Xisto Freitas da Piedade
