DILI, 19 Juñu 2029 (TATOLI) – Ministru Administrasaun Estatál, Tomás Cabral, aprezenta, iha reuniaun Konsellu Ministru, pontu situasaun kona-ba preparativu ba transladasaun restu mortál (isin-mate) husi preladu katóliku sira ne’ebé hala’o knaar pastorál iha Timor-Leste, husi Portugál bá Katedrál Dili, no konstrusaun Monumentu Don Martinho da Costa Lopes, iha Mehara, Tutuala, munisípiu Lautein.
Iha aprezentasaun ne’e, ministru hato’o ona programa ba transladasaun, ne’ebé sei hahú ho misa ida iha Portugál iha fulan-Jullu no termina ho serimónia fúnebre no omenajen iha Timor-Leste iha fulan-Setembru, ne’ebé organiza liuhusi koordenasaun entre Governu no igreja Katólika.
Serimónia sira ne’e inklui transferénsia restu mortál (isin-mate) husi Don Jaime Garcia Goulart, Don José Joaquim Ribeiro, Monseñór Martinho da Costa Lopes no Don Alberto Ricardo da Silva, no mós inaugurasaun Monumentu no Jardín Omenajen ba preladu sira iha Katedrál Dili.
Nune’e, halo mós pontu situasaun ba obra sira ne’ebé hala’o daudaun iha Katedrál Dili no iha Mehara, ne’ebé ho intensaun atu simu restu mortál (isin-mate) nomós prezerva memória no legadu husi preladu sira-ne’e, ne’ebé nu’udar figura importante sira iha istória Igreja Katólika no identidade nasionál Timor-Leste nian.
Lembra katak, iha loron 01 Abríl 2026, Governu Konstitusionál Dasiak, liuhusi reuniaun Konsellu Ministru, aprova rihun $600 ba prosesu transladasaun restu mortál (mate-isin) husi preladu katóliku sira-neʼebé hala’o knaar pastorál iha Timor-Leste, husi Portugál maia Katedrál Dili.
Notisía relevante: Governu aprova $600.000 ba transladasaun restu mortál bispu na’in-tolu husi Portugál mai Dili
Jornalista: Arminda Fonseca
Editora: Maria Auxiliadora
