DILI, 20 Juñu 2026 (TATOLI)–Komité Olímpiku Nasionál Timor-Leste (CONTL) hamutuk ho Olympic Council Of Asia, Sábadu ne’e, organiza Aichi-Nagoya Asian Games Fun Run International, ho objetivu atu promove valór sira husi Jogu Aziátiku, enkoraja moris saudável no ativu, hametin amizade, solidariedade no kooperasaun entre povu sira iha Ázia.
Sekretáriu Jerál Komité Olímpiku Nasionál Timor-Leste, Laurentino Guterres, hateten, eventu ne’e atu halibur atleta sira-ne’ebé sei reprezenta Governu no membru komunidade atu hamutuk selebra Jogu Asiátiku Aichi-Nagoya 2026 iha Japaun.
“Jogu Aziátiku la’ós de’it kompetisaun desportiva. Maibé jogu ne’e reprezenta unidade, respeitu no amizade entre nasaun sira. Liuhusi Fun Run ida-ne’e, ita selebra valór hirak-ne’e no reafirma Timor-Leste nia kompromisu ba dezenvolvimentu desportu no juventude,” Sekretáriu Jerál hato’o ba Jornalista sira iha Jináziu Dili, Sábadu ne’e.
Eventu ne’e sai oportunidade importante atu hasa’e konsiénsia kona-ba partisipasaun Timor-Leste iha Jogu Aziátiku no inspira jerasaun foun atleta timoroan sira.
Sekretáriu Jerál nota Timor-Leste kontinua uza desportu nu’udar instrumentu importante atu promove dezenvolvimentu sosiál, inkluzaun no envolvimentu internasionál.
Enkuantu, partisipasaun iha Jogu Aziátiku fó oportunidade ba atleta timoroan sira atu kompete hamutuk ho atleta mellór sira iha Ázia hodi hetan esperiénsia valiozu no lori bandeira nasionál ho orgullu iha palku kontinentál.
“Entaun hamutuk ita halai ba amizade, unidade, exelénsia no futuru desportu iha Timor-Leste no Ázia,” nia tenik.
Notísia relevante : Abríl 2026, atleta timoroan sei partisipa ASEAN Beach Games iha Xina
Iha biban hanesan, Diretór Jerál Desportu iha Ministériu Juventude Desportu Arte no Kultura (MJDAK), David Tomas, konidera atividade ne’e hanesan kampaña ida atu públiku hatene kona-ba Asian Games ne’ebé sei realiza iha Japaun iha Fulan-Setembru.
“Ha’u fó apresiasaun ba CONTL no Olympic Council Of Asia, ne’ebé organiza atividade ida-ne’e para ita promove atu ema hatene Timor-Leste mós sei hola parte iha atividade internasionál Asean Games ne’e,” nia hato’o.
Dirijente ne’e akresenta, atividade ne’e mós atu hametin valór solidariedade no hametin lasu amizade entre atleta sira.
Nune’e mós, Prezidente Olympic Council Of Asia (OCA), Wissam Trkmani, apresia ho partisipante sira hotu ne’ebé hatudu espíritu husi jogu.
“Ha’u-nia obrigadu ba partisipante sira hotu ho entuziasmu partisipa ona eventu ne’e. Ami OCA kontente tebes haree ita-boot sira iha ne’e. Ida-ne’e furak tebes atu asiste ho enerjétiku, no grupu ne’ebé emosionante,” nia katak.
Tanba ne’e, nia parte fiar katak ba futuru sei kria valór importante no hasa’e disiplina lideransa ba ema hotu-hotu.
“Ha’u hein katak iha futuru imi barak mak sei hola parte iha movimentu desportu nian, tantu atleta sira, treinadór no ofisiál sira,” nia motiva.
Jornalista : Osória Marques
Editora : Julia Chatarina
