DILI, 20 Juñu 2026 (TATOLI)–Ekipa jigante Makikit Laulara alias AD SLB, Sábadu kalan ne’e, iha Estádiu Munisipál Dili tenke fahe pontu ba malu ho adversáriu Santa Cruz FC, iha jogu kontinuasaun Liga Futeból Timor-Leste (LFTL) 2026 divizaun dahuluk. Maski nune’e SLB kontinua lidera tabela klasifikasaun provizóriu ho pontu hitu.
Bainhira jogu la’o, árbitru Bernanrdino Mascarinhas fó orientasaun liuhusi huu nia apitu jogu la’o. Iha kampu matan nia leten, jogadór ekipa rua hatán malu ho kontra-atake.
SLB ho ambisaun maka’as. Nia tun ho jogadór brazileiru Fábio Christian Cotinho no Italo Pimentel hamutuk ho jogadór timoroan sira hanesan Mouzinho de Lima no Filomeno Junior lansa kedan atake ba Santa Cruz.
Iha minutu lima, jogadór Italo halo ona presaun liuhusi sutu husi parte liman loos utiliza nia ain karuk ba Guarda-Rede Santa Cruz, maibé Guarda-Rede Alexandre Quintão salva bola la tama ba rede-laran.
Notísia relevante : SLB manán Assalam 3-0 iha Liga Futeból Timor-Leste 2026
SLB halo Santa Cruz book-an ladi’ak, durante minutu 10 Santa Cruz sempre falla iha sira-nia jogu, ho presaun maka’as.
Bainhira jogu la’o durante minutu 14, Santa Cruz organiza no loke jogu ho presaun maka’as husi liña klaran. Mudansa ne’e fó duni rezultadu pozitivu ba ekipa kapitál Dili ne’e. Iha minutu 16 jogadór Vicent Norty lansa ona golu hodi muda rezultadu ba 1-0.
Golu ne’e akontese tanba jogadór Nilton de Carvalho pasa bola a’as ida ho kalma husi liña karuk ba kaisa penalidade bola barullu jogadór estranjeiru ne’e hadau malu ho defeza SLB nian, nia mak sa’e a’as liu hodi kabesa bola tama liu rede laran.
SLB nia presaun hahú lakon, Santa Cruz foti fali oportunidade presaun nian. Jogadór sira kombina malu, maibé labele sobu tan defeza SLB nian ne’ebé lidera hosi Filomeno Junior.
Jogu nia intensidade sa’e maka’as liu, bainhira tempu normal iha parte dahuluk ramata ona, árbitru fó tan tempu adisionál minutu 3. Jogadór SLB utiliza oportunidade liuhusi Italo Pimentel lori bola mesak tama iha área penalidade defeza Santa Cruz, Nilton de Carvalho tebe monu nia ho bola árbitru foti desizaun fó kedan penalidade ba SLB lansa suta livre.
Mouzinho de Lima mak hetan oportunidade sai hanesan ezekutadór. Ikus Mouzinho suta bola tama duni ba rede laran muda rezultadu ba 1-1. Hakat kedan ba intervallu.
Semo ba parte daruak, ekipa rua nafatin lansa atake ba malu. Iha minutu 65 Mouzinho lansa sutu ida husi área penalidade nia li’ur bola la tama ba rede-laran maibé kona de’it iha trave baliza.
Italo mós esforsu maka’as hodi fahe bola ba nia kolega sira, maibé defeza Santa Cruz la fó fatin. Santa Cruz mós halo lansamentu maka’as maibé defeza SLB la fó fatin. Ikus to’o minutu 90+5 termina laiha tan golu. Ekipa rua fahe de’it pontu ida-ida ba malu.
Rezultadu ne’e SLB rekolla ona pontu hamutuk 7, tur liu iha pozisaun dahuluk, Santa Cruz pozisaun daruak ho pontu 7, maibé diferensa golu, Santa Cruz iha pozisaun daruak.
Jogadór Santa Cruz (4-4-2)
Alexandre Quintão, Ricardo Bianco, Romario Moniz, Miguel Silva, Juvito Moniz, Nilton de Carvalho, Amancio de Araújo, Fretelino dos Santos, Lassana Louis, Mario Quintão, Vicent Norty.
Jogadór SLBL (4-3-3)
Filonito Nugeira, Filomeno Junior, Pedro Vicente, Thawan de Oliveira, Leonio Freitas, Totifanio Amaral, Kawadwo Dompson, Mouzinho de Lima, Fazer Hurtado, Italo Pimentel, Favio Christian.
Jornalista : Hortêncio Sanchez
Editora : Julia Chatarina
