DILI, 21 Juñu 2026 (TATOLI)–Derrota 7-1 hasoru Alemaña la doko Curação nia fuan. Domingu dadeer iha Estádiu Kansas City, Blue Wave hadi’a hikas sira-nia dezempeñu iha kampu no konsege sita pontu dahuluk iha Kopa Mundiál 2026 hafoin empata 0-0 kontra Ekuadór iha Grupu E.
Pontu ida-ne’e boot liu rezultadu. Pontu ida ne’e hateten: Curação la mate. Sira apreende husi 7-1, sira fila mai ho fuan no dezeju ne’ebé maka’as.
Jogu nakonu ho emosaun no kontra-atake maka’as. Ekuadór domina suta. Iha minutu dahuluk Ekuadór lansa ona sutu hamutuk 13, husi sutu hirak ne’e, neen mak kona iha alvu, seluk sai ses husi Guarda-Rede.
Maski Ekuadór halo presaun maka’as, liuhusi jogadór sira hanesan, Enner Valencia, Moises Caicedo, Gonzalo Plata, maibé sira nia atake hirak ne’e ikus iha finalizasaun salva hotu husi Guarda Rede Curação, Eloy Room.
Guarda-Rede tinan 37 ne’e sai eroi. Salvasaun tuir salvasaun. Minutu 50, 57, 63 – Room la fó dalan. Nia soe-an, nia tahan, nia salva Curação nia dignidade hafoin derrota 7-1 iha jogu dahuluk kontra Alemaña.
Notísia relevante : Manán Kosta Marfin 1-2, Alemaña nia fatin iha jornada 32 Kopa Mundiál aseguradu
Maski nune’e, Curação mós la hamrik hanesan estátua iha kampu laran, sira halo presaun, sira luta hodi tane a’as nasaun nia dignidade. Sira mai atu kompete, maski monu iha jogu dahuluk, maibé nafatin foti oin hodi hatudu jogu brillante.
Avansadu Curação halo atake maka’as maibé labele prodús golu tanba lina defeza Ekuadór metin no metin tebes.
Husi forsa ne’ebé hanesan jogu la’o to’o minutu dahuluk parte termina, ekipa rua hela ho empata 0-0.
Tama ba parte daruak, Ekuadór kontinua dudu bola ba oin, buka meiu oinsa halo golu fó vitória iha parte daruak. Moises Caicedo lansa suta ida iha minutu 50, tuir kedas Gonzalo Plata. Maibé suta sira ne’e hela de’it hanesan suta no la rezulta golu.
Curação hatán hodi koko atake sira-nia adversáriu nia atake sira. Iha mós kontra-atake sira husi Blue Wave ne’ebé halo adeptu ekuatorianu sira hamnasa, hanesan esforsu Leandro Bacuna nian iha minutu 57, ne’ebé la akontese golu.
Ekuadór hatán hodi halo vingansa. Piero Hincapie mós lakon oportunidade ida. Plata halo tuir, maibé hetan fali frustrasaun hosi Guarda-Rede Curação, Room.
Curação mós hetan oportunidade perigozu sira liuhusi Leandro Bacuna no Livano Comenencia, ne’ebé sira na’in-rua hetan frustrasaun hosi Hernan Galindez. Maski ladún kestiona beibeik husi Room, Galindez mós hatudu nia kualidade hanesan Guarda-Rede ne’ebé iha abilidade.
Valencia no Kevin Rodriguez hafoin ne’e lansa sutu ba Curação iha minutu 63 nia laran, maibé Room konsege salva.
Husi presaun ne’ebé Curação halo, Ekuadór sente ona katak sira sei hasoru fallansu iha jogu ida-ne’e. Jogadór Willian Pacho, halai tama ba kaisa penalidade Curação nian iha minutu 66, la konsege hakat liu baliza Curação nian.
Ho nune’e jogu ne’e ramata ho 0-0. Pontu ida husi jogu ne’e mak dahuluk ba Ekuadór no Curação.
Jogadór sira husi Ekuadór
Hernan Galindez; Piero Hincapie, Willian Pacho, Alan Franco; Jordy Alcivar, John Yeboah, Pedro Vite, Moises Caicedo, Pervis Estupinian; Enner Valencia, Gonzalo Plata.
Jogadór sira husi Curação
Eloy Room; Joshua Brenet, Jurien Gaari, Armando Obispo, Sheren Floranus, Deveron Fonville; Juninho Bacuna, Livano Comenencia, Leandro Bacuna, Tahith Chong; Juergen Locadia.
Jornalista : Hortêncio Sanchez
Editora : Julia Chatarina
