Lere Anan Timur triste lembra Antigu Prezidente Lú Olo nia kompromisu “mate hamutuk” iha funu

DILI, 22 Juñu 2026 (TATOLI)—Tenente Jenerál Lere Anan Timur sente lakon no triste bainhira simu novidade hosi nia oan mane horikalan iha tuku 23:00-00:00 Otl kona-ba Antigu Prezidente Repúblika, Francisco Guterres “Lú Olo” nia falesimentu.

“Ha’u simu informasaun kona-ba Saudozu Lú Olo nia mate iha tuku 11 to’o 12 kalan. Ida-ne’e ha’u-nia oan mane mak fó-hatene, dehan Tiu Lu-Olo laiha ona. Maibé, ha’u dukur ona entaun ha’u ladún entende informasaun ne’e. Más, Lú Olo hanesan ha’u-nia kamarada, irmaun ne’ebé uluk moris hamutuk iha ai-laran, kompromete atu ami ‘mate hamutuk’ no ‘terus hamutuk’ iha funu no mós iha faze libertasau povu. Maski nune’e, libertasaun povu seidauk to’o rohan nia ba uluk ona, husik hela ami,” Lere Anan Timur dehan ba jornalista sira iha Saudozu Lú Olo nia rezidénsia, Faról, Dili, Segunda ne’e.

Maibé, tuir nia, destinu iha Maromak nia liman—dalan mak ida-ne’e duni, ema hotu-hotu sei tuir dalan ne’e.

Tenente Jenerál Lere Anan Timur haktuir nia hasoru malu da-ikus ho Saudozu Lú Olo iha Komemorasaun Restaurasaun Independénsia RDTL ba da-XXIV iha Tasi-Tolu hodi haree proposta Jenerál Falur nian ne’ebé hato’o kona-ba reforma sira-ne’e.

Notísia relevante: Lutu nasionál ba falesimentu antigu Prezidente Lú Olo hahú ohin

“Hanoin katak mensajen sira-ne’e, ami FRETILIN, buka hamutuk hodibele la’o bá-oin. Maibé, figura hanesan Lú Olo iha Partidu FRETILIN hela na’in tolu mak nia (Lú Olo), Lere Anan Timur no Marí Alkatiri,” nia tenik..

Líder Nasionál mate tutuir malu, nune’e nia apela ba joven intelektuál sira atu hatene hakraik an, presiza rona malu, presiza iha interese Estadu no tenke nakloke hodi halo autokrítika no krítika.

Saudozu Francisco Guterres Lú Olo hakotu nia peregrinasaun iha Domingu (21/06/2026), iha Ospitál Prince Court, Kuala Lumpur, Malázia.

Jornalista: Osória Marques

Editór: Xisto Freitas da Piedade