DILI, 22 Juñu 2026 (TATOLI )–Antigu Sekretáriu Estadu Juventude no Desportu no Atuál Sekretáriu Jerál Juventude FRETILIN, Abrão Saldanha ‘Noko Sico’ konsidera Antigu Prezidente Repúblika no Atuál Prezidente Partidu FRETILIN, Francisco Guterres ‘Lú Olo’ nu’udar líder úniku no ezemplár ba joven sira.
“Sente lakon tebes ba FRETILIN, ba Estadu, liuliu ba juventude FRETILIN, maibé Saudozu Prezidente Lú Olo ne’e hanesan ona modelu ida, ezemplu ida-ne’ebé iha joven barak liliu espesialmente FRETILIN nia haree banati tuir ninia lala’ok. Ita hetan figura ida úniku iha Timor no diferente ho sira seluk, ema ida-ne’ebé simples, ita bele dehan hanesan Sekretáriu Jerál (Mari Alkatiri) hateten inkorruptível,” Abrão Saldanha hateten ba Jornalista sira iha Rezidénsia Saudozo Francisco Guterres ‘Lú Olo’, Farol, Segunda ne’e.
Nia dehan, Lú Olo ema ne’ebé mak laiha forsa seluk bele interrompe nia, ho meiu saida de’it.
“Atu osan ka atu maihusi família ka saida de’it labele interrompe nia, ida-ne’e maka halo nia diferente figura, halo nia espesiál, halo nia diferente tebes ho sira seluk. Juventude FRETILIN sente lakon boot, nia mós husik hela memória no lisaun barak, hanoin oinsá mak sira-nia luta ne’ebé mak durante ne’e halo iha ita-nia rai,” nia katak.
Notísia relevante : Lere Anan Timur triste lembra Antigu Prezidente Lú Olo nia kompromisu “mate hamutuk” iha funu
Noko Sico katak, nia parte ho ekipa sei halo preparasaun hodi mobiliza hamutuk joven FRETILIN no joven ein jerál iha Aeroportu hodi simu Lú Olo nia kadaver.
“Ita hatene katak Prezidente Lú Olo ne’e FRETILIN maibé nia ne’e Homen do Estadu e Povo nian, Estudu Timor nian no timoroan tomak nian oan mane ida. Aban ita prepara hodi hasoru simu ita-nia Prezidente, prepara simu nia no husik nia ho dignidade tomak. Aban sei mai ne’e, Partidu no Estadu mak sei haree hamutuk,” nia tenik.
Abrão Saldanha hatutan: “Úniku iha timor ne’e barak, maibé ema ida hansan nia ne’e laiha, liuliu iha Timor laran tomak laiha, ema simples, la karak buat barak, nia hanesan Prezidente onorário ba juventude FRETILIN.”
Jornalista : Natalino Costa
Editora : Julia Chatarina
