DILI, 22 juñu 2026 (TATOLI)–Veteranu ativu iha instituisaun FALINTIL-Forsa Defeza Timor-Leste (F-FDTL), Lorenço José Cabral ‘Aquito Tanque de Guerra’, rekorda Antigu Prezidente Repúblika no Atuál Prezidente Partidu FRETILIN nu’udar líder di’ak iha funu-laran.
“Ami sente triste tanba lakon ami-nia líder di’ak ida-ne’ebé durante funu ami asegura malu, ohin loron nia mate iha ema-nia rai, ami nu’udar nia maluk ho timoroan tomak sente triste,” Aquito Tanque de Guerra hato’o ba jornalista sira iha Rezidénsia Saudozo Francisco Guterres ‘Lú Olo’, Farol Segunda ne’e.
Nia koñese Saudozu nu’udar ema simples, haraik-an nomós gosta rona ema seluk nia ideia.
“Ha’u koñese nia, primeiru durante 24 anos la’o hamatuk ne’ebé husi ain kukun to’o fuuk laran, ha’u koñese nia. Hau-nia Kompañia Rejiaun III, tanba ne’e mak ha’u koñese nia durante funu, ema ida ho karater la kanten, la’ós hadau malu ko’alia, saida de’it mak ema ko’alia ba nia, nia rona nomós aumezmu tempu nia rona ami-nia situasaun kuandu ladi’ak dehan A, dehan B,” nia akresenta.
Notísia relevante : Lere Anan Timur triste lembra Antigu Prezidente Lú Olo nia kompromisu “mate hamutuk” iha funu
Aquito Tanque de Guerra triste tanba dalaruma Ministériu Saúde demora desizaun atu manda veteranu sira halo tratamentu intensivu ba rai-li’ur.
“Dalaruma ami bá konsulta demora fali ami, ida-ne’e mak ami triste, nu’udar ema dalan mak mate, mais nu’udar ema veteranu sempre hanoin malu, bele problema to’o ne’ebé ami nunka haluha malu. Nia (Lú Olo) ha’u bolu Maun Lú mate la’ós hadomi tanba nia fó mean ho mutin ba ha’u, maibé hadomi nia nu’udar 24 anos luta hamutuk nunka soe malu,” nia lembra.
Nune’e, nia rekomenda ba Ministériu Saúde atu labele demora desizaun bainhira ema ruma presiza tratamentu avansadu.
“Ami nu’udar veteranu ami triste, primeiru Komadante Mau Kalo, segundu Majór Jenerál Sabika nia ferikoan, terseiru ha’u la hatene ha’u-nia Maun Lú ba urjente ka lae, maibé ha’u rona nia mate de’it,” nia katak.
Veteranu ne’e hatutan: “Ha’u rekomenda ba Ministériu Saúde, Komandante Maukalo nia moras sei demora tanba osan laiha, tropa hotu-hotu soe osan hamutuk mak foin bá halo tratamentu, hanesan mós daudaun Maun Lú. Ha’u hatene katak ne’e Eis Prezidente Repúblika sempre Estadu tau-matan. Ha’u tenki husu ba Ministra Saúde, mate sira-ne’ebé mate ne’e tenke dignu.”
Jornalista : Natalino Costa
Editora : Julia Chatarina
