BAUKAU, 23 Juñu 2026 (TATOLI)—Veteranu Baukau liuhusi eis Prezidente Konsellu Munisipál Kombatente Libertasaun Nasionál (CMCLN-sigla portugeza), Fernando Gusmão ‘Beredu’u’, sente triste tanba lakon belun lutadór Lú Olo ne’ebé bainhira sei moris asume nu’udár Xefe Estadu no Prezidente Partidu FRETILIN, ne’ebé durante nia lideransa hatudu simplisidade no lahatene foti an.
“Saudozu ita-nia luta na’in, ita-nia boot. Ami triste maibe ida-ne’e Maromak nia planu. Lakon ida-ne’e ba povu no nasaun. Nia ema simples, la hanesan ema boot sira seluk ne’ebé gaba an,” Fernando Gusmão ‘Beredu’u’ hateten iha ninia rezidensia Vila Nova, Tersa ne’e.
Notísia relevante: Emosaun tristeza marka xegada kadáver eis-Prezidente Repúblika Lú Olo iha aeroportu Dili
Fernando “Beredu’u” konsidera, nuudar luta na’in ida-ne’ebé hamutuk ho maluk sira seluk liberta povu no rai Timor-Leste husi kolonializmu to’o hetan independensia durante 24 iha ai-laran.
Kombatente ne’e relata durante Saudozu Francisco Guterres ‘Lú Olo’ nia mandatu nu’udár Prezidente Republika, la hatene insulta nia maluk ka adversáriu polítiku iha palku polítika.
Tuir “Beredu’u” katak valor sira-ne’ebé Antigu Prezidente husik hela tenke sai memória ba jerasaun foun no líder polítiku sira atu kontinua promove unidade nasionál.
Beredu’u informa katak CMCLN Baukau planeia sei dezloka bá Dili hodi presta omenajen no partisipa iha prosesu fúnebre saudozu nian tanba sai momentu despedida ikus ba maluk luta na’in ida-ne’ebé fó kontribuisaun boot ba independénsia nasaun.
Entretantu, Eis Prezidente Parlamentu Nasionál, Francisco Guterres Lú Olo hakotu iis iha 21 Juñu 2026 bainhira hala’o tratamentu saúde iha ospitál Prince Court, Kuala Lumpur, Malázia.
Jornalista: Natalino Belo
Editór: Xisto Freitas da Piedade
