DILI, 23 Juñu 2026 (TATOLI)- Prezidente Repúblika, José Ramos-Horta, presta omenajen ikus ba antigu Prezidente Repúblika Francisco Guterres “Lú Olo”, hafoin fila husi nia vizita bá Austrália iha semana kotuk.
Ramos-Horta hateten katak ho antigu Prezidente Lú Olo nia mate, Timor-Leste lakon kombatente no veteranu ne’ebé luta durante tinan 24 ba independénsia nasaun nian. Nia konsidera Lú Olo hanesan polítiku no eroi ida ne’ebé serbí Estadu durante luta ba ukun rasik-an.
“Ita lakon boot la’ós de’it ba lideransa FRETILIN, maibé ba nasaun. Maibé, nia eransa, legadu sei fó inspirasaun ba povu tomak no partidu FRETILIN kontinua buat ne’ebé nia husik hela”, Ramos-Horta hateten iha Faról, ohin.
Xefe Estadu mós dehan katak nia sempre valoriza kontribuisaun Lú Olo nian ba rai ida-ne’e, dezde uluk kontribui ba dame, liberdade no demokrasia nia laran.
Nia subliña maski Lú Olo mate ona, maibé Estadu nafatin tau-matan ba faluk no oan-ki’ak sira, sei haree tuir lei ne’ebé eziste. Bainhira lei laiha mak haree lezislasaun ne’ebé fó apoiu ba ema família hanesan Prezidente Lú Olo nian tanba nia veteranu durante 1975.
Kona-ba relasaun entre nia ho maktoban, Ramos-Horta hateten katak sempre di’ak no hasoru malu no foin lalais iha Malázia mós bá vizita nia, maibé to’o iha ne’ebá ko’alia mak ho eis-Primeira Dama Cidália Mouzinho tanba maktoban iha ona fatin ICU ho pneomonia.
Tuir observasaun jornalista iha terrenu, bainhira Prezidente Ramos-Horta to’o iha rezidénsia maktoban nian, vizita ka presta omenajen uluk hafoin mak kumprimenta espoza maktoban no oan-ki’ak sira.
Hafoin ida-ne’e, kumprimenta mós Sekretáriu-Jerál Partidu FRETILIN, Marí Alkatiri, inklui kuadru partidu FRETILIN nian ne’ebé iha.
Iha vizita ne’e, Prezidente Repúblika José Ramos-Horta konversa kuaze oras ida ho Sekretáriu-Jerál Partidu FRETILIN, Marí Alkatiri, ho eis-Primeiru-Ministru, Taur Matan Ruak, Jenerál Lere Anan Timur no seluk tan.
Iha biban ne’e, Partidu Libertasaun Populár (PLP) ne’ebé lidera husi Prezidente Partidu, Taur Matan Ruak, ho militante sira presta mós omenajen ba Lú Olo.
Notísia relevante: Lú Olo estadista ne’ebé hatudu responsabilidade ba Estadu
Jornalista: Arminda Fonseca
Editora: Maria Auxiliadora
