DILI, 24 Juñu 2026 (TATOLI)–Universidade Nasionál Timor Lorosa’e (UNTL) deside muda serimónia graduasaun ne’ebé programa atu realiza iha loron 26 Juñu 2026 ba 29 Juñu 2026, tanba períodu lutu nasionál ba falesimentu Saudozu Francisco Guterres Lú Olo.
Reitór UNTL, Joviano António da Costa, hateten katak graduasaun ba loron primeiru, 25 Juñu 2026, sei la’o tuir programa ne’ebé prepara ona. Maibé, graduasaun ba loron daruak, ne’ebé marka ba sesta 26 Juñu 2026, sei muda ba Segunda, 29 Juñu 2026.
Nia esplika desizaun ne’e foti hafoin senadu no estrutura UNTL halo diskusaun no konsultasaun ho Governu, atu respeita períodu lutu nasionál ne’ebé dekreta husi Estadu ba omanajen ba Saudozu Francisco Guterres Lú Olo.
“Mudansa oráriu ne’e la’ós situasaun baibain, maibé rezultadu husi koordenasaun no komunikasaun naruk ho Governu,” Reitór UNTL Joviano António da Costa ba jornalista sira iha Konferénsia imprensa iha Sentru Konvensaun Dili (CCD), Kuarta ne’e.
Reitór mós hato’o deskulpa ba graduadu sira no família sira, liuliu sira-ne’ebé maihusi munisípiu sira atu partisipa iha serimónia ne’e.
“Ha’u husu deskulpa ba graduadu sira no família sira tanba mudansa ne’e. Ami komprende katak balun maihusi dook maibé ami hein ita-boot sira-nia kompreensaun tanba situasaun ne’e relasiona ho eventu nasionál ida importante,” nia subliña.
Nia apela ba graduadu sira atu aproveita períodu finde semana ho di’ak no prepara-an ba serimónia graduasaun ne’ebé sei realiza iha Segunda semana oin.
Iha graduasaun UNTL XXXIV ne’e finalista hamutuk 1.461. Husi totál 1.461, programa Baixarelatu no Lisensiatura hamutuk na’in-1.410 kompostu husi Faculdade de Agricultura (71), Faculdade de Engenharia, Ciência e Tecnologia (150), Faculdade de Educação e Humanidades (370), Faculdade de Medicina e Ciências da Saúde (448), Faculdade de Economia e Gestão (135), Faculdade de Direito (41), Faculdade de Ciências Sociais e Políticas (158), Faculdade de Filosofia e Ciências Humanas (8), Faculdade de Ciências Exatas e Naturais (7), no Faculdade de Turismo, Artes, Indústrias Criativas e Culturais (22).
Ba programa Pós-Graduação no Mestradu, totál finalista hamutuk (51), ne’ebé kompostu husi: Pós-Graduação em Direito, Especialidade de Direito Público (1), Pós-Graduação em Direito (5), Pós-Graduação em Medicina Tropical e Saúde Comunitária (14).
Ba programa Mestradu, área hanesan Mestrado em Engenharia iha ualu (8), Mestradu em Ensino de Português no Contexto de Timor-Leste (8), Mestrado em Direito (3), Mestrado em Estudos da Paz e do Conflito (2), Mestrado em Desenvolvimento Comunitário (2) no Mestrado em Educação Especialidade em Línguas e Literatura (5), Formação de Professores (1) no Movimentos Sociais (2).
Jornalista: Osória Marques
Editór: Xisto Freitas da Piedade
