Kovalima, 24 Juñu 2026 (TATOLI) – PárokuAve Maria Suai no estrutura partidu FRETILIN Kovalima halo misa rékien ba antigu Prezidente-Repúblika, Francisco Gutettes Lú Olo, hodi fó omanajen no husu Nain Maromak atu fó fatin deskansa ikus ho di’ak iha kadunan santu.
Iha ómilia, Padre Pároku Ave Maria Suai, Aderito Vilar Morreira, hateten Eis Prezidente-Repúblika Francisco Guterres Lú Olo, durante moris sakrifika nia aan tomak ba luta libertasaun pátria no kontribui mós luta ba liberasaun povu iha era ukun rasik aan.
“Ba jerasaun foun sira ho saudozu nia dedikasaun luta ba ukun rasik no kontribuisaun ba liberta povu, nune’e husu ba jerasaun foun sira liuliu estudante sira atu kontinua banati tuir hodi estuda atu lori nasaun ne’e ba oin liuliu liberta povu husi kiak no mukit”, Padre Pároku Ave Maria Suai, Aderito Vilar Morreira haklaken liuhusi nia omília bainhira preside Misa rékien ba Saudozu Francisco Guterre Lù Olo iha Igreja Ave Maria Suai, ohin.
Padre dehan saudozu Lú Olo hanesan eis Prezidente Parlamentu Nasionál no Eis Prezidente Repúblika hodi hala’o pontu prinsipál hanesan, Aman, Mestre no formadór ne’ebé hala’o durante iha nia pregrinasaun moris maske ho nia kapasidade naton, maibé iha responsabilidade hodi tau dignidade estadu no Governu ni’an.
“Saudozu hanesan aman durante nia moris tanba kaer responsabilidade iha nia família no nasaun nian hodi defende no asegura responsabilidade. Mestre oinsá hanorin jerasaun foun atu labele tauk no hakiduk tenke nakonu ho responsabilidade ho domin, moris iha luta hodi projeta ba futuru no durante nia mandatu tane aas dignidade Estadu no Governu la halo diferénsia nune’e ukun ba ema hotu,” katak Padre ne’e.
Liuhusi misa ne’e, Amu husu ba Kovalima-oan hotu kontinua reza ba Saudozu Eis Prezidente atu nia-klamar bele hetan fatin di’ak iha reinu lalehan.
Iha fatin hanesan, Koodenadór Partidu FRETILIN Munisípiu Kovalima, Francisco de Andrade, dehan misa rékien ba saudozu Francisco Guterres Lú Olo ne’e organiza husi Militante Partidu Frente Revolusionária Timor-Leste Independente (FRETILIN) iha munisípiu Kovalima.
“Inisiativa ne’e mai husi ami rasik hodi husu misa rékien ba saudozu Francisco Guterres Lú Olo , hanesan Prezidente Partidu FRETILIN no dedika nia-aan ba luta ukun rasik aan durante 24 iha Ai-laran. Hafoin iha era ukun-aan sai Prezidente Parlamentu Nasionál no Prezidente Repúblika. Ho nune’e ami rasik hola inisiativa enkontru ho estrutura partidu tomak molok atu ba Dili partisipa haloot saudozu iha jardín erói Metinaru hodi presta omenajen ikus,” nia dehan.
Hafoin Misa rékien Autoridade Kovalima hamutuk ho funsionáriu sira, veteranu, alunu husi ensinu báziku to’o ensinu superiór, militante partidu politiku sira hala’o prosesaun bá tau ai-funan no sunu lilin iha momentu masakre Setembru Negro 1999.
Jornalista:Celestina Teles
Editór:Florencio Miranda Ximenes
