Governu fó Toleránsia Pontu iha 26 Juñu ba serimónia fúnebre saudozu Lú Olo

DILI, 25 Juñu 2026 (TATOLI)—Governu Konstitusionál da-sia (IX) deside fó Toleránsia Ppntu iha 26 Juñu ba serimónia fúnebre saudozu Antigu Prezidente Repúblika Demokrátika Timor-Leste, Francisco Guterres Lú Olo.

Notísia Relevante: Alkatiri agradese desizaun Estadu haloot Lú Olo entre Francisco Xavier no Ma’huno

Hafoin restaurasaun independénsia, Saudozu Francisco Guterres Lú Olo hakna’ar-an nu’udar Prezidente Parlamentu Nasionál iha tinan 2002 no eleitu nu’udar Prezidente Repúblika entre tina 2022, maibé mate (faleseu) iha loron 21 Juñu 2026 iha Malázia.

Líder nasionál ne’e mós nu’udar perkursu polítiku liga maka’as ba luta ba independénsia Timor-Leste nian no durante administrasaun Portugál nian iha territóriu, ne’ebé integra tiha ona movimentu nasionál.

Rekoñese mós katak iha tinan okupasaun Indonézia nian, Lú Olo hala’o kna’ar oioin nu’udar líder polítiku iha movimentu rezisténsia ba libertasaun nasionál, no sai figura influente ida iha luta ba libertasaun nasionál. Nune’e tenke iha konsiderasaun tanba iha serimónia fúnebre ema barak mak hakarak fó omenajen ikus ba Herói Nasionál no antigun Prezidente Repúblika.

Desizaun ne’e foti bazeia ba alínea b) númeru 2 artigu 7.º Lei n.º 10/2005, loron 10 Agostu, ne’ebé alterasaun husi Lei n.º 3/2016, loron 25 Maiu, no Lei n.º 10/2023, loron 05 Abril, fó dalan atu fó toleránsia pontu tanba akontesimentu nasionál.

Haree ba alínea d) númeru 6 artigu 7.º Lei n.º 10/2005, loron 10 Agostu, ne’ebé alterasaun husi Lei n.º 3/2016, loron 25 Maiu, no Lei n.º 10/2023, loron 5 Abríl, kompeténsia Primeiru-Ministru nian mak fó toleránsia pontu ba “funsionáriu no ajente ministériu sira ka servisu sira-ne’ebé depende ba sira, inklui institututu no organizmu sira-ne’ebé integra iha administrasaun indireta Estadu nian.

Nune’e, mós tuir alínea b) númeru 2 no alínea d) númeru 6 artigu 7.º Lei n.º 10/2005, loron 10 Agostu, ne’ebé alterasaun husi Lei n.º 3/2016, loron 25 Maiu, no Lei n.º 10/2023, loron 5 Abril, Primeiru-Ministru iha ezersísiu deside tuir mai:

• Fó toleránsia pontu iha loron 26 Juñu 2026, loron tomak. Despaxu ida-ne’e abranje funsionáriu, ajente no traballadór hotu ne’ebé servisu iha servisu administrasaun direta Estadu nian, sentrál ka deskonsentradu, ka iha organizmu administrasaun indireta nian.
• La inklui iha númeru anterior rekursu umanu servisu públiku sira-ne’ebé tanba natureza serbisu nian tenke kontinua funsiona iha períodu ne’e.
• La prejudika kontinuidade no kualidade servisu públiku ne’ebé presta, dirijente másimu servisu sira ne’ebé temi iha númeru anterior tenke promove dispensasaun ekivalente ba dever asiduidade nian ba sira-nia rekursu umanu, iha loron ida-ne’ebé sei fiksa iha tempu oin.

Enkuantu sekuénsia ba seremóniu fúnebre maktoban Francisco Guterres Lú Olo sei realiza iha 26 Juñu 2026. Antes atu haloot mate-isin iha jardin dos herois Metinaru, sei iha vizita ba  CCF Komoro, Kuarte Jerál F-FDTL, Palásiu Prezidénsia, Parlamentu Nasionál no sei lori ba misa iha igreja Katedrál.

Notísia Relevante: PM Xanana orienta Assanami haloot Lú Olo ho dignu

Jornalista : Alexandra da Costa

Editór        :  Cancio Ximenes