PNTL prepara seguransa másima ba serimónia funebre Saudozu Lú Olo
DILI, 25 Juñu 2026 (TATOLI)—Polísia Nasionál Timor-Leste (PNTL) halo ona preparativu tomak atu garante seguransa no kontrolu movimenti tráfiku durante serimónia funebre ba Antigu Prezidente Repúblika, Francisco Guterres ‘Lú Olo’, ne’ebé sei realiza iha Sesta (26/06).
Portavós PNTL, Superintendente Xefe Polísia João Belo dos Reis, hateten, PNTL halo ona mapamentu ba dalan hotu ne’ebé sei uza ba movimentu kadaver Saudozu Lú Olo, nune’e husu ba sidadaun sira atu fó apoiu durante operasaun ne’e.
“Polísia Nasionál Timor-Leste halo ona mapamentu ba rute ne’ebé aban sei uza ba movimentu kadaver Eis-Prezidente Lú Olo nian. Ami husu apoiu husi sidadaun hotu atu iha pasiénsia bainhira PNTL taka dalan balun. Depois prosesu remata, dalan sira sei loke fila fali ba públiku,” João Belo dos Reis, hato’o iha Konferénsia imprensa ne’ebé realiza iha Kuartél Jerál PNTL, Kaikoli, Kinta ne’e.
Notísia relevante : Governu fó Toleránsia Pontu iha 26 Juñu ba serimónia fúnebre saudozu Lú Olo
Nia esplika, tuir planu operasionál PNTL Munisípiu Dili, operasaun seguransa ne’e sei hetan apoiu husi Unidade Espesiál Polísia (UEP) no Unidade Patrullamentu Marrítima (UPM) hodi garante serimónia hotu la’o ho di’ak.
Tuir planu ne’ebé prepara ona, iha tuku 07:30 dadeer, kadaver Saudozu Lú Olo sei sai husi Rezidénsia Farol ba Komité Sentrál FRETILIN (CCF), liu husi Avenida Portugal, Avenida Lurumata no Avenida Prezidente Nicolau Lobato.
Husi CCF, sei ba Kuartél Jerál F-FDTL liu husi Avenida Prezidente Nicolau Lobato no kontinua ba Palásiu Prezidensiál. Depois husi Palásiu Prezidensiál, kadaver sei lori ba Igreja Katedrál Nossa Senhora Imaculada da Conceição, Vila-Verde ne’ebé misa funebre sei hahú iha tuku 10:00 dader.
Hafoin misa, sei kontinua ba Parlamentu Nasionál liuhusi Rotunda Mandarin, Hotel Timor, Palásiu Governu no Acait. Ramata husi Parlamentu Nasionál, sei ba Jardim dos Herois Metinaru atu realiza serimónia funebre, no sei liu husi Banco Mandiri, Palásiu Governu, Ministériu Juventude, Desportu, Arte no Kultura , Largu Lecidere, Rotunda Bidau, Ponte Kuluhun, Bekora, Hera to’o Metinaru.
Iha tempu hanesan, Governu liuhusi komunikadu imprensa ida fó sai iha loron 25 Juñu 2026, anunsia toleránsia pontu durante loron tomak iha Sesta (26/06), relasiona ho serimónia funebre ba Antigu Prezidente Repúblika, Francisco Guterres ‘Lú Olo’
Jornalista : Cidalia Fátima
Editora : Julia Chatarina
