DILI, 25 Juñu 2026 (TATOLI)—Portavós Polísia Nasionál Timor-Leste (PNTL), Superintendente Xefe Polísia João Belo dos Reis, hateten, posibilidade iha tan vítima tráfiku umanu ne’ebé sei identifika hafoin rekolla informasaun husi vítima 33 hanesan hanesan sidadaun índia, nune’e Autoridade Seguransa sei hakle’an informasaun hodi aprezenta ba Ministériu Públiku (MP).
“Kompañia-na’in ema na’in-rua depois apoiu mós husi timoroan balun. Sira ne’ebé mak transporta, sira ne’ebé mak akomoda, sira ne’ebé mak promote, sira ne’ebé lansa propaganda hodi ema sira ne’e (indianu) mai iha ne’e ita sei submete hotu ba Ministériu Públiku hodi halo investigasaun kle’an ba sira,” Portavós hato’o iha Konferénsia imprensa ne’ebé realiza iha Kuartél Jerál PNTL, Kaikoli, Kinta ne’e.
Aleinde ne’e, Autoridade Seguransa sei halo mós investigasaun ba lisensa atividade sira iha Timor.
“Sei halai hotu ba iha ne’ebá, saida mak sira halo, iha lisensa ka lae? Saida mak sira halo iha duni benefísiu ba Estadu Timor-Leste ka lae? ita sei buka tuir, fatin rua mak ita identifika hela, poténsia ba sira-nia negósiu nian. Maibé buat ne’ebé mak sira halo sei verifika hotu katak ida-ne’e iha lisensa ou lae?,” João Belo dos Reis, akresenta.
Notísia relevante : PNTL asegura jerente empreza ne’ebé bosok indianu na’in-33 mai serbisu iha Timor-Leste
Portavós hatutan, sei komunika mós ho Embaixada Índia iha Timor-Leste inklui maluk balun husi Índia hodi bele asegura vítima sira.
“Sidadaun ne’e ita komunika nafatin ho Embaixada Índia iha Timor-Leste inklui sira-nia kolega sira para bele akumula sira sementara iha fatin balun iha área Bekora ne’ebá hodi hein prosesu investigasaun ne’e la’o,” nia katak.
Autoridade Seguransa daudaun ne’e asegura ona suspeitu na’in-33 ba krime tráfiku umanu.
Antes ne’e, iha loron 17 Juñu 2026, membru PNTL asegura ona indianu na’in-rua hanesan jerente ba empreza Simrn Kour Vijay Enterprise, Lda, ne’ebé bosok traballadór indianu na’in-33 hodi mai serbisu iha Timor-Leste.
Atuasaun ne’e bazeia ba vítima nia denúnsia kona-ba problema ne’ebé sira enfrenta, katak sira sai vítima ba promesa balun husi maluk indianu sira, ne’ebé hateten katak sei fó serbisu ba sira iha Timor-Leste, nune’e sira konsege to’o duni Timor maibé sira la hetan serbisu no sira-nia moris susar liután.
Jornalista : Cidália Fátima
Editora : Julia Chatarina
