DILI, 25 Juñu 2026 (TATOLI)-Antigu Prezidente Repúblika Francisco Guterres “Lú Olo” nia mate halo povu Timor-Leste sente xoke boot no lakon figura di’ak ida ne’ebé sempre halo relasaun di’ak ho ema hotu.
Laura Soares Abrantes nu’udar povu baibain ne’ebé mai presta omenajen ba maktoban Lú Olo hateten nia hanesan figura ida-ne’ebé boot tebes, tanba sai grande eroi ba nasaun ne’e.
Tuir nia, bainhira sira rona antigu Prezidente Repúblika Francisco Guterres “Lú Olo” hakotu iis sente lakon líder di’ak ida, ne’ebé domin na’in.
“Ha’u hakarak destaka valór importante tolu iha ne’e, nia ema ida leál. Nia lealdade ne’e inkomparavel, umildade no simplisidade. Buat tolu ne’e refere duni ba ita povu no liuliu foinsa’e sira atu hametin no kuda iha jerasaun foun sira”, Laura Soares Abrantes dehan ba Tatoli iha Faról, ohin.
Tuir nia, esforsu ne’ebé Lú Olo halo, ema seluk atu troka labele mak bainhira sai Prezidente Asembleia Konstituinte ne’ebé halo lei inan ba nasaun ne’e.
“Ida-ne’e buat ida ne’ebé ita rekoñese no fó omenajen ho hakru’uk, tanba lisaun barak ita aprende husi nia. Lutu ne’ebé daudaun iha ida-ne’e la’ós sai simbolu de’it, maibé ita lutu husi fuan tanba nia dedikasaun ba rai ne’e ita sura la hotu”, nia dehan.
Luciano dos Santos Lopes ne’ebé mós presta omenajen hateten hanesan povu no jerasaun foun ba nasaun ne’e sente lakon lideransa di’ak no motivadór di’ak ida.
“Legadu ne’ebé nia rai mak líder ida simples no nia moris tomak la’ós esforsu de’it depoizde ita ukun-an, maibé nia kontribuisaun ba pátria hahú nia luta-na’in ida, serbisu sai militár iha frente armada no klandestina hanesan ema ida ne’ebé lideransa di’ak”, dehan.
Hodi dehan legadu sira ne’ebé maktoban husik hela ne’e hanesan jerasaun foun presiza la’o tuir karáter lideransa ida-ne’ebé obidiente, simplesidade, haku’ak ema hotu no nunka hasai liafuan aat hodi defama ema seluk.
“Ita haree nia sempre haku’ak ema hotu tanba nia hanesan povu ain-tanan no povu maubere nia oan ida mak sai figura ida ne’ebé di’ak ba ita hotu”, konklui.
Notísia relevante: Memória husi pesoál seguransa Lú Olo: “Ita lakon aman, maun no ema di’ak ida-ne’ebé buka la hetan”
Jornalista: Arminda Fonseca
Editora: Maria Auxiliadora
