DILI, 24 Juñu 2026 (TATOLI)—Universitáriu oioin tantu hosi Instituet of Business (IOB) no Institutu São João de Brito (ISJB), Kasait Likisá hamutuk ho reitór, dosente no estrutura institusionál sira, presta omenajen ikus ba Antigu Prezdente Repúbliku, Francisco Guterres “Lú Olo”, espíritu luta nian no valór sira-ne’ebé husik hela sei sai inspirasaun ba jerasaun foun sira.
Senadu Jerál IOB, Carlino da Cruz, hateten katak komunidade estudantíl sente triste tebes ho lakon líder ida-ne’ebé iha papél importante iha luta libertasaun nasionál no iha prosesu konstrusaun Estadu hafoin independénsia.
“Nu’udár joven no estudante, ami sente triste tebes tanba lakon líder matenek ida-ne’ebé, dezde tempu luta libertasaun pátria, kontribui maka’as ba dame no estabilidade nasional to’o ita hetan ukun-an. Maski ohin loron nia husik ona ita, ami fiar katak nia espíritu no ideia sira nafatin moris ho ami. Ami prontu atu kontinua banati eransa ne’ebé nia husik ba jerasaun foun sira,” Carlino ba jornalista sira iha Faról, Dili, Kinta ne’e.
Iha fatin hanesan, Prezidente Senadu Estudantíl ISJB Kasait, André Barreto, ne’ebé akompaña hosi reitór, dosente sira no reprezentante estudante na’in-haat, hateten katak prezensa sira iha fatin omenajen nian hodi fó respeitu no onra ikus ba figura istórika ida-ne’e.
Nia konsidera Saudozu Lú Olo nu’udár líder úniku ida-ne’ebé la’ós de’it hatudu korajen no determinasaun iha tempu luta armada, maibé mós kontinua dedika nia-an ba dezenvolvimentu nasaun nian hafoin independénsia.
“Nu’udár jerasaun foun, ami sente triste tanba lakon figura ida-ne’ebé sakrifika nia-an ba povu no nasaun durante tempu luta no kontinua fó ninia kontribuisaun ba dezenvolvimentu nasionál. Husi ha’u-nia perspetiva, nia líder ida-ne’ebé úniku no merese sai ezemplu ba ema hotu,” André.
Nia akresenta sakrifísiu ne’ebé líder rezisténsia no jerasaun tuan sira halo hodi hetan independénsia tenke sai motivasaun ba juventude no universitáriu sira atu kontinua luta ba dezenvolvimentu nasionál.
“Luta ne’ebé ita presiza kontinua ohin loron mak luta ba dezenvolvimentu. Dezenvolvimentu la’ós de’it kona-ba projetu boot sira, maibé mós liuhosi kontribuisaun no inisiativa ki’ik sira-ne’ebé bele lori mudansa pozitiva iha sosiedade no iha instituisaun edukasaun sira. Ne’e mós forma ida husi luta ba dezenvolvimentu,” nia tenik.
Líder estudantil mós apela ba juventude sira atu kontinua banati no tuir ezemplu di’ak hosi líder rezisténsia sira-ne’ebé durante tempu difisil nafatin hatudu unidade, solidariedade no espíritu servisu hamutuk ba interese nasaun nian.
Jornalista: Osória Marques
Editór: Xisto Freitas da Piedade
