DILI, 26 Juñu 2026 (TATOLI)—Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK), Sesta ne’e maizumenus tuku 08:30, sobu atividade ilísitu scam call center, iha Tibar, Postu Administrativu Bazartete Munisípiu Likisá.
DSIK liuhusi nia pesoál informasaun ne’ebé destaka iha fatin referida deteta katak iha otél ida besik Rontunda Tibar suspeitadu halo atividade ilísitu scam call center.
Nune’e, ohin Autoridade Seguransa halo kedan operasaun ba fatin ne’e hodi detein suspeitu na’in-61 nu’udar sidadaun Indonézia no balun Kambódia, ho fraglante delitu.
DSIK rejista kazu ne’e ho NUC: 0227/26.PNSIK ho tipu krime jogu ilísitu Tibar.
Notísia relevante : MP delega hikas kazu scam online iha Oekusi ba PCIC hakle’an investigasaun
Diretó Servisu Investigasaun Kriminál, Superintendente Xefe Polísia João Belo dos Reis, haktuir, ohin purvolta tuku 08:00 resin hetan informasaun husi informadór sira, katak iha fatin ida iha Tibar suspeitadu iha atividade ne’ebé halai ba scam call center, ne’ebé lansa bosok ema liuhusi meiu telemóvel.
“Ho nune’e ekipa husi Diresaun Servisu Nasionál Investasaun Kriminál nian tun iha fatin ne’ebá, ita deskonfia duni iha movimentu ruma ne’ebé ita presiza deskonfia. Tanba ne’e mak ami halo intervensaun ba fatin ne’ebá iha fraglante delitu. Ita tun ita hetan sidadaun Indonézia na’in-61 iha kuartu ida, halo hela sira-nia atividade henesan calling center ka penipuan ba sidadaun sira,” João Belo hateten ba jornalista iha Kuartél Jerál PNTL, Kaikoli, Sesta ne’e.
Nia dehan, daudaun sidadaun Indonézia na’in-61 transporta ona mai DSIK Komandu Jerál PNTL atu halo identifikasaun no investigasaun.
“Ita detein kedas sidadaun na’in-61, kompostu husi feto nain-17, mane na’in-44 ne’ebé daudaun ita lori sira mai iha Kuartél Jerál iha Diresaun Nasionál Servisu Investigasaun kriminál para halo identifikasaun hodi halo separasaun ida-ne’ebé mak mai hanesan vítima, sira ne’ebé mak sente ema mai iha ne’e bosok sira, ita bele konsidera hanesan tráfiku umanu, balun ne’ebé mak sai hanesan operadór, balun ne’ebé mak hanesan fasilitadór lori ema sira ne’e mai,” nia katak.
Entre suspeitu sira ne’e, na’in-hitu mai husi Kambódia inklui sira-nia patraun hanesan autór prinsipál halo atividade ne’e.
Suspeitu na’in-hitu ne’e nu’udar rede scaming husi Kambódia, bainhira rede (scaming) sobu iha ne’ebá, sira hala’o tama mai iha Timor.
“Tuir informasaun ne’ebé mak foin hetan, balun mai fulan-rua ona, balun mai fulan-tolu ona no balun mai fulan-haat, ne’ebé deskonfia sira halo atividade ne’e hahú Fulan-Janeiru ou Fevereiru tinan ne’e,” nia hato’o.
Ekipa DSIK foti iha lokál krime rede Starlink, telefone, laptop sira ne’ebé sira uza relasaun ba sira-nia atividade ne’e no daudaun Polísia lori mai hotu identifikasaun. Inklui pasaporte 66 tanba suspeitu sira balun halai lakon tiha bainhira Polísia atu sobu fatin hala’o atividade.
“Dadaun ne’e halo hela identifikasaun ba sira. Halo hela Investigasaun ba sira ne’ebé mak agora dadaun maluk sira haree iha li’ur neeba”,nia dehan.
Diretór Servisu Investigasaun Kriminál ne’e husu ba Xefe Suku, Xefe Aldeia sira inklui Xefe Joventude sira bainhira identifika tan asaun sira hanesan ne’e iha sira nia bairu laran, husu atu halo kontaktu ho Polísia hodi halo intervensaun.
“Ne’e hanesan iha Oékusi nia operasaun, ne’e modelu hanesan,” nia tenik.
Jornalista : Natalino Costa
Editora : Julia Chatarina
