DILI, 27 Juñu 2026 (TATOLI) – Jogadór estrela hosi klube Paris Saint-Germain (PSG), Ousmane Dembélé, hatudu klase mundiál hodi marka hat-trick (golu tolu) hodi lori Fransa manán Noruega 4-1. Jogu ne’e sai nu’udar partia ikus iha faza grupu (Grupu I) Kopa Mundiál FIFA 2026, nune’e lori kedan ekipa Les Bleus lidera kalsifikasaun ho pontu sia (9) hosi vitória rekuperada tolu.
Konfrontu boot ne’ebé determina pozisaun klasifikasaun nian ba nasaun rua ne’e hala’o iha Estádiu Gillette, Foxborough, Estadus Unidus, iha loron-Sábadu madrugada, oras Timor-Leste nian.
Bainhira apitu inisiál rona, ekipa rua lansa kedan kontra-atake ba malu tuir tátika no kbiit ne’ebé iha. Maske nune’e, Fransa ne’ebé mai ho títulu favoritu hatudu sira-nia forsa koletiva hodi halo presaun maka’as hasoru defeza Noruega nian.
Iha minutu primeiru nia laran, Fransa kuaze ona kria surpreza. Kapitaun Kylian Mbappé hakat kail defeza adversáriu no dulas suta forte ida, maibé bola soke de’it iha trave baliza nian.
Fransa foin konseke naksubar rede Noruega nian iha minutu hitu (7′). Dembélé simu asisténsia (pasa jen) hosi Mbappé, dulas an tama iha kaixa penalidade, no haruka suta kail ho ain-loos ne’ebé semo loos ba rede laran. Rezultadu muda ba 1-0.
Noruega ne’ebé bazeia ba jogu koletivu prátiku, estraga oportunidade di’ak ida iha minutu 14. Avansadu Jørgen Strand Larsen kontrola pasajen ida hosi Fredrik Aursnes ho di’ak, maibé nia suta sai dook hosi baliza, la rezulta golu.
Hanesan ho senáriu golu dahuluk, Dembélé reajusta fali nia pozisaun hodi marka golu segundu iha minutu 20. Dala ida-ne’e, nia halo movimentu ba leten/sentrál no aponta suta maka’as ida ba kantu karuk hosi baliza ne’ebé guarda-rede Egil Selvik labele foti. Rezultadu sa’e ba 2-0.
Golu ne’e halo Noruega la nonok no la tuur hakmatek. Sira hatán kedas ho lalais: Thelo Aasgaard halai ho kbiit ba lina penalidade hodi simu pasajen di’ak hosi Andreas Schjelderup, hafoin ne’e aponta suta ba kantu karuk husi baliza Mike Maignan. Bola tama liu ba rede Fransa nian no muda rezultadu ba 2-1 iha minutu 21.
Maske Noruega responde ona golu ida, Fransa kontinua domina ritmu jogu no hetan fali sira-nia golu datoluk iha minutu 32. Golu ne’e mosu bainhira Dembélé simu pasajen naruk hosi Aurélien Tchouaméni, hakat liu hodi halakon fali guarda-rede Egil Selvik, no dudu bola ba rede laran. Hat-trick hosi Dembélé ne’e taka parte dahuluk ho vantajen 3-1.
Dramatizmu penalidade no Golu taka iha segunda Parte
Hakat ba segunda parte, intensidade jogu sai manas liu tan. Noruega halo presaun maka’as hodi buka dalan atu hatutan golu. Sira hetan oportunidade osan-mean penalidade iha minutu 48 hafoin avansadu Oscar Bobb hetan falta hosi kadiak Theo Hernández iha área proibidina. Strand Larsen hakat ba oin hodi ezekuta penalti, maibé nia suta hetan blokeiu (salvamentu) espetakulár hosi Mike Maignan.
Minutu kontinua la’o, jogu mós avansa ba oin ho dramátiku, pasa hosi ain ba ain ho tranzisaun lalais. Noruega iha tan oportunidade foun ida iha minutu 72, rona tiru diretu hosi Oscar Bobb, maibé Maignan hatudu fali nia kbiit hodi salva baliza Les Bleus.
Fransa konseke aumenta sira-nia vantajen iha tempu adisionál (injury time), lora minutu 90+4′. Barcola ne’ebé foin tama lansa kruzamentu (hasa’e bola) di’ak, no Désiré Doué dudu de’it bola ba rede Noruega nian, hodi halo guarda-rede Selvik la kontrola. Jogu termina ho vitória 4-1 ba Fransa.
Klasi fikasaun Finál Grupu I
Husi rezultadu ne’e hatudu momoos katak, Fransa mak lidera Grupu I ho pontu 9 (vitória tolu de’it), mentres Noruega okupa pozisaun daruak ho pontu neen (6). Ho nune’e, nasaun rua ne’e mak automatikamente kualifika (hetan tike) ba Ronde 32 (Faza Eliminatória) Kopa Mundiál 2026 nian.
Aliñamentu Jogadór (Line-up)
Noruega (Treinadór: Ståle Solbakken): Egil Selvik (GR); Fredrik Bjørkan (Marcus Pedersen 46′), Leo Østigård, Henrik Falchener (Jesper Löngren 66′), Fredrik Aursnes; Patrick Berg, Kristian Thorstvedt (Morten Thorsby 46′); Andreas Schjelderup, Thelo Aasgaard, Oscar Bobb (Antonio Nusa 83′); Jørgen Strand Larsen.
Fransa (Treinadór: Didier Deschamps): Mike Maignan (GR); Theo Hernández, Maxence Lacroix, Dayot Upamecano (Ibrahima Konaté 74′), Jules Koundé (Malos Gusto 87′); Manu Koné, Aurélien Tchouaméni; Désiré Doué, Michael Olise (Rayann Cherki 65′), Ousmane Dembélé (Bradley Barcola 65′), Kylian Mbappé (Jean-Philippe Mateta 87′).
Jornalista: Hortêncio Sanchez
Editór: Rafael Ximenes de A. Belo
