DILI, 27 Juñu 2026 (TATOLI)– Primeiru-Ministru, Kayrala Xanana Gusmão, simu “Prémiu Profesór Doutór Jorge Miranda – Konstituisaun no Direitu Umanu” iha aula magna reitória Universidade de Lisboa, hodi afirma katak distinsaun ne’e pertense bá povu Timor-Leste tomak.
Iha serimónia entrega prémiu ne’e, Primeiru-Ministru, Kayrala Xanana Gusmão hateten, prémiu ne’e la’ós de’it onra pesoál, maibé reprezenta luta koletiva povu Timor-Leste nian ne’ebé sofre no luta to’o hetan independénsia, liberdade ba Estadu ida-ne’e.
“Premiu ne’e pertense bá povu Timor-Leste tomak, ne’ebé kontinua defende liberdade no konsolida Estadu demokrátiku,” PM Xanana hateten iha aula magna reitória universidade Lisboa, kinta ne’e (25/06).
Konstituisaun 2002 nu’udar Fundamentu Estadu nian
Konstituisaun Repúblika Demokrátika Timor-Leste, aprovadu iha tinan-2002, sai hanesan baze fundamentál bá Estadu demokrátiku, direitu umanu no Estadu direitu. Tanba ne’e Xanana Gusmão mós hato’o obrigadu bá Asembelia Konstituinte ne’ebé lidera prosesu konstitusionál ne’e.
Primeiru-Ministru mós subliña katak independénsia Timor-Leste hetan tanba sakrifísiu povu no solidariedade internasionál, liuliu husi povu Portugál.
“Nune’e protesaun direitu umanu tenke sai parte ida iha moris loron-loron, no dezenvolvimentu labele limita de’it bá kresimentu ekonómiku, maibé tenke inklui edukasaun, saúde, empregu no protesaun ambiente”, Xefe Governu afirma.
Enkuantu kona-ba demokrasia, PM Xanana alerta katak demokrasia hanesan nasaun joven Timor-Leste presiza kontinua hametin instituisaun sira, kapitál umanu no infraestrutura atu asegura estabilidade no progresu nasionál.
“Tanba ne’e apela bá juventude atu hametin multilateralizmu no respeitu bá direitu internasionál, no husu implementasaun rezolusaun ONU kona-bá autodeterminasaun Sahara Osidentál”, nia rekomenda.
Iha serimónia ne’e, Professór Jorge Miranda, figura importante iha área konstitusionalizmu Portugés, hato’o agradesimentu bá atribuisaun prémiu no konsidera distinsaun ne’e hanesan onra bá área direitu konstitusionál tomak.
Nia refere bá Primeiru-Ministru Xanana Gusmão hanesan figura istórika ne’ebé simboliza luta bá liberdade no dignidade povu Timor-Leste.
“Konstituisaun Timor-Leste reprezenta susesu importante iha konstrusaun Estadu demokrátiku modernu, bazeia bá direitus umanus, separasaun podér no supremasia lei,” Jorge Miranda hateten.
Reitór Universidade Lisboa, Profesór Luís Ferreira mós hato’o boas-vindas no agradesimentu bá prezensa Primeiru-Ministru Timor-Leste no delegasaun sira hotu.
“Atribuisaun prémiu ne’e mak forma ida atu rekoñese kontribuisaun iha área konstituisaun no direitus umanus, no fortalese diálogu akadémiku entre Portugál ho paíz luzófonu sira, liuliu Timor-Leste”, Reitór ne’e hateten.
Órgaun reitória ne’e mós reafirma kompromisu Universidade de Lisboa atu kontinua apoia formasaun akadémika no promosaun valór demokrátiku sira, hodi hametin liután kooperasaun entre instituisaun rua iha futuru.
Jornalista: Alexandra da Costa
Editór: Rafael Ximenes Belo
