DILI, 29 Juñu 2026 (TATOLI) – Konsellu Administrasaun Fundu Infraestrutura (KAFI) aprova orsamentu 1.576.662,75 atu moderniza semáforu 11 iha Dili.
“Iha semana kotuk ita aprova ona osan ba semaforu modernu hamutuk 11 husi Ministériu Transporte no Komunikasaun [MTK] ho totál orsamentu $1.576.662,75”, Ministru Planeamentu no Investimentu Estratéjiku, Gastao de Sousa, dehan ba Tatoli, ohin.
Ministru Transporte Komunikasaun, Miguel Manetelu, hateten orsamentu ba semáforu foun KAFI aprova ona maka iha prosesu tuirmai sei lansa konkursu públiku iha Komisaun Nasionál Aprovizionamentu (CNA, sigla portugés) no bainhira iha ona empreza manán-na’in maka sei implementa projetu moderniza semáforu.
Antes ne’e, Xefe Manutensaun Sinál Tránzitu iha DNTT, João Eugénio da Silva, hateten katak semáforu 11 mak sei hetan smodernizaun. Husi núemru ne’e, tolu mak instalasaun foun, ne’ebé sei tau iha Elemloi, Ai-mutin no Kuluhun de Baixu. Enkuantu semáforu hitu seluk kontinua instala iha fatin tuan sira hanesan kruzamentu Balide, Vaganza, Vila Verde, Kolmera, Audian, Bidau (Tokobaru), Bidau Lesidere no iha Eletrisidade de Timor-Leste (EDTL) Vila Verde.
Notisía relevante: DNTT planeia moderniza hotu semáforu sira ne’ebé aat iha Dili
Jornalista: Arminda Fonseca
Editora: Maria Auxiliadora
