DILI, 29 Juñu 2026 (TATOLI) – Parlamentu Nasionál (PN), iha reuniaun plenária, segunda-feira ne’e, aprova proposta rezolusaun númeru 52/VI(3a), kona-ba alterasaun ba Kuadru Kompromisu Timor-Leste iha aneksu ba Protokolu Alterasaun Akordu ASEAN kona-ba Sirkulasaun Pesoa Singulár. Akordu ne’e uluk aprovadu ba adezaun liuhusi rezolusaun Parlamentu Nasionál númeru 46/2025, loron 15 Outubru.
Vise-Ministra ba Asuntu ASEAN, Milena Rangel, hateten rezolusaun ida-ne’e reflete país nia kompromisu atu kumpre rekizitu hotu-hotu ne’ebé ASEAN ezije antes país tama ofisilamente henesan membru ogranizasaun.
“Ita halo negosiasaun kompletu, halo tuir padraun ASEAN nian. Ita kumpre kompromisu hothotu tuir duni saida mak ASEAN ezije husi ita, depois ita-nia prosesu finál tiha iha reformasaun ba akordu ne’e rasik, para kada Estadu-membru hotu tenke muda tuir nia formatu foun”, nia hateten.
Nia eslika katak tanba iha mudansa ba format akrodu, Governu presiza lori filafali dokumentu tuir prosesu legál, liuhusi Konsellu Ministru no Parlamentu Nasionál, atu ratifika. “Ne’e para asegura nia transparénsia, klaridade no mós ninia konsisténsia ba iha implementasaun akordu ida sirkulasaun pesoa singulár”, dehan.
Governante ne’e salienta katak akordu ida-ne’e aplika de’it ba sidadaun husi nasaun membru ASEAN ne’ebé halo movimentu ba objetivu servisu ne’ebé okupa kargu sira profisionál ne’ebé presiza kualifikasaun espesífika..
“Más, ita-nia lei migrasaun no laborál mak kontinua nafatin bele regula entrada sira hanesan ne’e. Komo iha mudansa formatu foun, entaun hodi fali mai Parlamentu bele ratifika”, katak.
Notísia relevante: Governu aprova akordu ASEAN ba sirkulasaun pesoa singulár
Jornalista: Nelson de Sousa
Editora: Maria Auxilidora
