DILI, 29 Juñu 2026 (TATOLI)-Deputada husi bankada Partidu Demokrátiku (PD), Maria Teresa Gusmão, husu ba Governu atu konstrui lalais muru protesaun ba iha irrigasaun mota Soba iha postu administrativa Laga, munisípiu Baukau.
Nia levanta preokupasaun husi populasaun postu Laga, no proposta emerjénsia ba reabilitasaun irrigasaun mota Soba ne’ebé presiza muru protesaun tanba tempu udan volume mota boot ameasa tebes família 32 nia hela fatin tanba afeta ba inundasaun no presiza normaliza urjente.
Proposta ne’e hato’o ona ba Ministru Planeamentu no Investimentu Estratéjiku, Gastão de Sousa, no hatún ona despaxu ba Ministru Obra Públika (MOP), Samuel Marçal, iha 10 Juñu 2024. Tuirmai iha 24 Janeiru 2025, Diresaun Nasionál Prevensaun no Kontrolu Cheias, Sesaun Ribeira no Obra Marítima, halo ona observasaun direta iha terrenu no konfirma katak área ne’e presiza duni reabilitasaun emerjénsia.
Iha mós rekomendasaun husi autoridade suku Soba, Laga, katak presiza duni reabilitasaun emerjénsia, maibé to’o ohin loron la realiza.
Vise-Ministru ba Asuntu Parlamentár, Adérito Hugo da Costa, rejista preokupasaun ne’e no sei hato’o ba ministériu tutela hodi responde lalais.
Jornalista: Nelson de Sousa
Editora: Maria Auxiliadora
