DILI, 29 Juñu 2026 (TATOLI)–Tribunál Judisiál Primeira Instánsia Dili (TJPID), Segunda ne’e, kontinua halo julgamentu ba kazu partisipasaun ekonomia no negósiu, ne’ebé envolve husi dirijente no kargu xefia na’in-tolu iha Parlamentu Nasionál (PN) iha tinan 2012 ba reabilitasaun Rezidénsia Antigu Prezidente Parlamentu Nasionál (PPN) Fernando de Araújo ‘Lasama’, iha Farol.
Iha julgamentu ne’e, Tribunál rona depoimentu husi Arguidu HdRG ne’ebé nu’udar na’in ba Empreza U-Rema Unip.Lda.
Nia haktuir ba Tribunál, empreza nia operasaun iha tinan 2010 no iha 2012, nune’e nia tuir konkursu ba reabilitasaun projetu morru iha PPN no Vise-PPN iha Farol. Nia dehan, laiha koñesimentu kona-ba Sekretáriu Jerál PN halo levantamentu osan ho montante $80.000 tanba nia la’ós hola parte iha Governu.
Arguidu mós la hatene sé mak momentu halo Bill of Quantity (BoQ) ba projetu ne’e. Nia haktuir, momentu ne’ebá nia hetan kontaktu husi Komisaun Aprovizionamentu PN nian atu konkorre ba projetu reabilitasaun ne’e rasik.
Nune’e, na’in ba empreza ne’e hatama dokumentu ba projetu no nia maka liu projetu ne’e. Arguidu admitidu ba projetu ho valór $21.000-resin.
Notísia relevante : Tribunál julga antigu kargu Xefia na’in-tolu PN ba krime partisipasaun ekonomia
Maibé haree ba projetu ne’e baze ba donu projetu nia orientasaun, Antigu PPN Fernando Lasama momentu ne’ebá hakarak halo tan parrajen privada no buat balun tan. Entaun, arguidu prefere mantein BoQ ida-ne’e, maibé aumenta ka ajusta de’it montante osan. Nune’e, osan ba projetu ne’e husi $21.000 aumenta sai $41.000-resin.
Nia dehan, momentu ne’ebá nia empreza halo de’it morru protesaun no parrajen karreta ba PNN Fernando Lasama, enkuantu ba reabilitasaun Rezidénsia Vise-PPN ne’e empreza seluk mak halo.
Arguidu haktuir tan, momentu ne’ebá projetu na’in fó livre no molok atu halo reabilitasaun ne’e sira halo vizita ida ba Rezidénsia PPN iha Farol no sira konkorda halo reabilitasaun ba rezidénsia inklui morru. Vizita ne’e rasik hetan akompañamentu husi Antigu PNN Fernando Lasama no momentu ne’ebá kedan nia orienta atu halo parrajen karreta.
“BoQ ne’e iha ona, maibé ajustamentu de’it. Imi tenke halo nusa para ha’u-nia pedidu ne’e tama hotu,” Arguidu katak iha sala julgamentu.
Nune’e, Komisaun Aprovizionamentu PN halo aprovasaun ba nia empreza inklui empreza tolu seluk hodi halo reabilitasaun ba Rezidénsia PPN no Vise-PPN iha Farol.
Empreza ne’e la’ós ajudika de’it husi PN, maibé momentu ne’ebá tuir konkursu normál. Arguidu husu hodi aumenta tan osan $21.000 tanba nia tenke selu badaen no haree ba folin sasán.
Arguidu deklara katak, buat hotu la’o di’ak, tanba ne’e mak Ajensia Nasionál Dezenvolvimentu (ADN) momentu ne’ebá rekomenda ba PN atu halo pagamentu. Maibé to’o ikus PN hateten katak projetu ladi’ak no hamosu de’it prejuizu hamutuk $4.000 ba Estadu.
HdRG hakfodak momentu ne’ebá tanba projetu ne’e hetan ona apresiasaun no aprovasaun molok halo pagamentu.
Arguidu ba Tribunál jura katak osan Estadu ne’e nia halo duni tuir BoQ no tuir donu do projetu nia pedidu, la uza osan povu arbiru iha momentu ne’ebá.
Hafoin Tribunál rona tiha depoimentu husi Arguidu, marka fali julgamentu ne’e ba loron 27 Jullu 2026 tuku 09:00 dadeer hodi kontinua rona depoimentu.
Jornalista : Natalino Costa
Editór : Evaristo SOares Martins
