DILI, 30 Juñu 2026 (TATOLI)-Deputadu husi bankada Frente Revolusionária Timor-Leste Independente (FRETILIN), José da Cruz, solisita ba Ministériu Justisa (MJ) atu renova pasaporte timoroan sira iha Portugál.
Deputadu ne’e aprezenta preokupasaun timoroan sira-nia iha Portugál tanba maioria sira-nia pasaporte kaduka ona.
“Sira haree ba situasaun ne’e, aproxima ho Embaixada Timor-Leste iha Lizboa, maibé la konsege atende sira-nia pedidu ne’e ho di’ak no orienta fali sira atu manda e-mail ba iha Embaixada Timor-Leste iha Reinu Unidu. Ida-ne’e sai preokupasaun boot ba sidadaun sira iha ne’ebá, hanesan bolseiru no traballadór”, nia levanta iha reuniaun plenária Parlamentu Nasionál, ohin.
Deputada ne’e mós salienta katak Governu Portugál daudaun halo hela inspesaun rigoroza ba sidadaun imigrante sira ne’ebé hela iha país ne’e.
“Oinsá mak ita-nia embaixada ne’ebé durante ne’e reprezenta sidadaun timoroan sira la konsege fó informasaun di’ak, oinsá atu bele renova sira-nia pasaporte”, nia kestiona.
Tanba ne’e, nia dehan bainhira timoroan sira husu servisu ne’e toma konta ba Ministériu Justisa atu fasilita renovasaun pasaporte.
“Ida-ne’e mak sira husu Governu iha seriedade atu haree nia sidadaun iha rai-li’ur hodi asesu ba dokumentu ne’ebé reprezenta Estadu ida-ne’e nian”, katak.
Vise-Ministru ba Asuntu Parlamentár, Adérito Hugo, rejista preokupasaun ne’e no sei envia ba Ministériu Negósiu Estranjeiru no Kooperasaun no Ministériu Justisa atu toma atensaun.
Jornalista: Nelson de Sousa
Editora: Maria Auxiliadora
