DILI, 30 Juñu 2026 (TATOLI)-Parlamentu Nasionál, liuhusi reuniaun plenária, tersa-feira ne’e, aprova votu pezár ba falesimentu antigu deputadu José Soares “Maugeno”.
Vise-Sekretária Meza Parlamentu, Bendita Moniz, hateten ho aprovasaun votu ne’e Parlamentu Nasionál reúne iha sesaun plenária hakarak espresa ninia profundu pezár ba falesimentu antigu deputadu José Soares no enderesa sentidu kondolénsia ba faluk, oan-ki’ak, família no partidu FRETILIN no amigu enlutadu.
Matebian hakotu iis iha loron 23 fulan-Juñu tinan ne’e iha Ospitál Nasionál Guido Valadares (HNGV, sigla portugés).
Matebiain moris iha Hatulia, Fatubesi, iha munisípiu Ermera, iha loron 13 fulan-Abríl 1943.
Frekuenta eskola iha Fatubesi, entre 1950-1952, eskola misaun Saleziana entre 1952-1957. Estudu agronomia, espesializadu iha téknika kafekultór no ezerse hanesan tékniku prátika agríkola.
Iha tempu portugés, matebian kumpre serbisu militár obrigatóriu iha Tilaria, iha Dili, no nomeadu fali ba iha Glenu.
Partisipasaun polítika iha luta ba indepedénsia, nu’udar militante ASDT, iha Maiu-Setembru 1974, hafoin muda ba FRETILIN serbí hanesan delegadu iha munisípiu Ermera entre 1974-1975, inklui asaun sira ne’ebé envolve ho militár hanesan soldadu tropa portugeza, asaltu iha 1975 ba Payol kompañia militár portugeza no kaptura arma.
Iha fulan Agostu-Setembru 1975, matebian ho komandante sira seluk realiza operasaun ida hodi resgata pesoa ne’ebé kapturadu empreza iha Aifu, Ermera.
Hafoin hetan persegisaun husi militár Indonézia, matebian mós partisipa ativamente iha rede klandestina, posperiormente empeña ativamente mobilizasaun no konsesializasaun ba referendu iha 1999, rezultadu iha suku Fatubesi a favór ba indepedénsia.
Hafoin restaurasaun indepedénsia, asume kargu nu’udar koordenadór partidu FRETILIN iha munisípiu Ermera, eleitu husi lista FRETILIN hanesan deputadu iha asembelia konstituente, ezerse hanesan deputadu lejizlatura dahuluk iha komisaun agrikultura no meiu-ambiente.
Jornalista: Nelson de Sousa
Editora: Maria Auxiliadora
