DILI, 30 Juñu 2026 (TATOLI) – Jogadór Suplente Brazil Gabriel Martinelli susesu iha nia jogu hafoin marka golu iha tempú adision 90+5 bainhira kontra Japaun iha Jornada 32 Kopa Mundiál 2026 hodi kompleta vitoria 2-1, lori Brazil semo ba jornada 16.
Jogu entre nasaun rua hala’o, tersa madrugada oras Timor-Leste nian ne’ebé hala’o iha Estádiu Houston.
Bainhira jogu hahú ekipa rua lansa kedan presaun ba malu. Japaun joga ho velosidade lais no dudu bola as hodi buka oportuniade iha lina oin Brazil nian.
Ho jogu ne’ebé lais, Japaun hetan vantajen surpreza 1-0 hasoru Brazil iha primeira parte grasa ba golu Kaishu Sano nian iha minutu 29. Brazil domina jogu no atake, maibé luta atu hetan dalan ida liu Japaun susar.
Ho defensivu ne’ebé metin Japaun mantein nia kualidade ho rezultadu 1-0 to’o minutu 45 remata hakat ba intervalu.
Semo ba segunda parte, ho 0-1, Brazil aumenta sira nia atake iha segunda parte. Vinicius Junior aselera tun iha flanku karuk maibé seidauk bele sobu defeza Japaun.
Avansadu Real Madrid lohi adversáriu ida no tama iha kaixa penalti Japaun nian. Maibe, suta Vinicius salva husi Zion Suzuki iha minutu 46.
Tantu Japaun no Brazil depois troka atake sira. Atake Brazil nian, ne’ebé buka golu empata, hetan impedimentu husi defeza japoneza.
Oportunidade osan-mean Brazil nian hodi marka golu mosu iha minutu 52. Danilo halo kruzamentu ida hosi parte loos ba iha kaixa penalidade Japaun nian. Bruno Guimaraes kabesa bola, maibé Suzuki iha pozisaun loos ho reflexu exelente sira hodi para bola ne’e.
Ekipa Samba lansa atake ida tuir ida seluk. Dala ida-ne’e, Casemiro kabesa bola hosi distánsia besik. Maibé, Takehiro Tomiyasu iha pozisaun loos hodi blokeia Casemiro nia kabesa iha minutu 54, molok Suzuki para fali.
Brazíl nia presaun ho bola naruk no kruzamentu sira natoon ona hodi halo Japaun la hakmatek. Iha minutu 56, Gabriel Magalhaes halo kruzamentu ida hosi liman-karuk ba poste dook Japaun nian.
Casemiro hein hela iha ne’ebá no kabesa bola ho di’ak. Dala ida-ne’e, Suzuki la konsege para Casemiro nia kabesa. Brazil halo empata ho 1-1.
Empata 1-1 fó motivasaun ba brazileiru sira hodi aumenta tan golu sira. Iha minutu 59, Vinicius Junior nia suta husi ângulu ne’ebé apertadu iha parte karuk hetan fali para husi Suzuki molok kona poste.
Brazil nia presaun ne’ebé kontinua obriga Japaun atu konsentra iha defeza. Samurai Blue konsege tama iha defeza adversáriu, maibé luta atu kria oportunidade sira atu marka golu.
Remate suplente Gabriel Martinelli husi ninin área penalidade nian iha minutu 78 mós halai sees husi baliza Japaun nian.
Iha minutu 89, Vinicius iha oportunidade atu hatama golu, maibé nia suta hetan blokeiu husi defeza adversáriu. Brazil hetan kantu ida.
Kabesa Fabinho nian iha minutu 90+4 navega liu baliza Japaun nian. Presaun Brazil nian ikus mai selu ho golu Gabriel Martinelli nian iha minutu 90+5.
Martinelli nia golu mai hosi Bruno Guimaraes, ne’ebé iha espasu suta ideál. Maibé, Guimaraes hili atu pasa bola ba Martinelli. Martinelli ho kalma tau bola iha kantu kraik karuk hosi baliza Suzuki nian. Brazil hetan vantajen 2-1 hasoru Japaun iha minutu 90+5.
Eskoru 2-1 mantein to’o jogu remata. Brazil halakon Japaun ho 2-1 hodi hakat ba jogu 16 husi Mundiál 2026. Enkuantu Japaun tenke elemina ona husi Kopa Mundiál.
Aliniasaun jogadór
Brazil:
Alisson Becker; Danilo, Marquinhos, Gabriel Magalhaes, Douglas Santos, Bruno Guimaraes, Casemiro, Lucas Paqueta, Rayan, Matheus Cunha, Vinicius Junior.
Japaun:
Zion Suzuki, Hiroki Ito, Takehiro Tomiyasu, Shogo Taniguchi, Daichi Kamada, Keito Nakamura, Ritsu Doan, Kaishu Sano, Daizen Maeda, Ayase Ueda, Junya Ito.
Jornalista: Hortêncio Sanchez
