BOBONARU, 30 Juñu 2026 (TATOLI) – Komunidade aldeia Tuluata, suku Bobonaru Vila, postu administrativu Bobonaru, manifesta kontentamentu ho implementasaun projetu reabilitasaun estrada rurál tipu plum concrete, ne’ebé durante tinan barak sai hanesan pedidu prinsipál sira-nia.
Rezidente aldeia Tuluata, Paulo da Costa Moniz, hateten molok projetu ne’e implementa, komunidade sempre hasoru difikuldade boot, tanba kondisaun estrada aat no loron-loron tenke la’o iha fatuk no tahu-laran.
Notísia relevante: Komunidade preokupa projetu reabilitasaun estrada rurál iha Bobonaru vila abandonadu
“Ami kontente tanba durante tempu naruk ami la hetan estrada di’ak. Ami la’o iha tahu-laran no dalan ne’e hanesan mota Lomea. Agora, Governu fornese kompaña ida atu halo estrada ida-ne’e halo ami haksolok tebes tanba la la’o iha tahu-laran ona”, Paulo Moniz dehan ba Tatoli, ohin.
Xefe Suku Bobonaru Vila, Jacinto Godinho Pereira, informa katak uma-kain 140-resin mak hein hela obra ne’e durante tinan barak no, iha tinan 2026, Governu hahú realiza reabilitasaun estrada ho naruk metru 2.290, maski seidauk kobre to’o área hotu.
Nia argumenta obra ne’e konsidera bele hakonu povu nia esperansa ba ukun-an iha setór infraestrutura bázika no fiar katak Governu bele kontinua projetu iha tinan oin atu liga subaldeia rua seluk ne’ebé ho uma-kain liu 40 seidauk asesu ba estrada.
“Estrada ne’e vantajen ba komunidade ne’ebé atu lori nia produtu lokál mai merkadu tanba uluk ne’e sira la’o ho tutur de’it mais agora la presiza tutur ona. Ha’u espera katak sei iha kontinuasaun tinan tuirmai, tanba ha’u-nia subaldeia rua iha sorin liubá ho uma-kain 40-resin seidauk asesu estrada, ho nia razaun projetu ida-ne’e la tutan kobre to’o iha ne’ebá”, nia salienta.
Iha sorin seluk, Diretór Empreza Kudaguah Unipessoal Lda., Paulino Ricardo, hateten implementasaun obra fizíka hahú iha Maiu 2026 no to’o agora servisu clearing remata ona 100%, no empreza kontinua halo drenajen no muru protesaun ho progresu fíziku to’o porsentu 3.
Paulino esplika katak durantente implementasaun empreza hasoru obstákulu tanba kondisaun klima, liuliu udan ne’ebé halo karreta labele tama tula materiál durante semana ida.
Maski nune’e, nia apresia kooperasaun di’ak husi autoridade lokál no komunidade durante implementasaun projetu, no afirma kompañia sei esforsu atu remata obra tuir kontratu ne’ebé asina ho Ministériu Obra Públika.
“Kuandu tempu fó biban, ami sei serbisu maka’as atu finaliza lalais projetu ida-ne’e tuir tempu ne’ebé determina iha kontratu, tanba sira mós hein durante tinan barak ona, sofre liu ba dalan ida-ne’e. Sira kontente no agradese ba kompañia no Obra Públika. Husu ba empreza atu finaliza lalais estrada ne’e”, nia hato’o.
Estrada ho nia distánsia kilómetru 2,2 ne’e empreza lokál ne’e ezekuta ho orsamentu $251,879.14 ho durasaun kontratu tinan ida.
Notísia relevante: Komunidade husu kompleta konstrusaun drenajen no trotoar iha estrada Maliana
Jornalista: Sergio da Cruz
Editora: Maria Auxiliadora
