DÍLI, 30 Juñu 2026 (TATOLI) – Diretór-Jerál Sekretaria Estadu Formasaun Profisionál no Empregu (SEFOPE), Carlito do Rosário Cabral, hatoo katak ajénsia sira ne’ebé durante ne’e halo rekrutamentu hodi haruka traballadór Timoroan ba serbisu iha rai-li’ur ne’e tanba iha kooperasaun Business-to-Business (B2B).
Diretór ne’e esplika katak prosesu rekrutamentu husi ajénsia privada sira ne’e tanba iha akordu kooperasaun entre entidade formasaun no rekrutamentu rai-laran ho kompañia sira iha rai-li’ur.
Nia haktuir katak mekanizmu sira hanesan ne’e la envolve diretamente Governu iha prosesu rekrutamentu tanba ida-ne’e parseria entre entidade privada rai-laran ho rai-li’ur.
“Prosesu rekrutamentu ne’e la liu husi SEFOPE ka Governu,” dehan Carlito ba Tatoli via telefone, ohin.
Jestór ne’e dehan, tanba ne’e, traballadór Timoroan sira ne’ebé mak ba serbisu iha rai-li’ur liuhusi ajénsia privada sei la hetan akompañamentu husi adidu traballu.
Nia esklarese katak Governu so koloka de’it adidu traballu ba nasaun sira ne’ebé iha ona kooperasaun mobilidade laborál ho Governu Timor-Leste, inklui Austrália, Korea Sul, Japaun no Nova Zelándia.
Entretantu, nasaun sira hanesan Singapura, Portugal no rai-seluk ne’ebé la iha akordu mobilidade laborál, traballadór Timoroan sira sei la hetan asisténsia husi adidu traballu.
Carlito husu ba traballadór Timoroan sira iha rai-li’ur ne’ebé enfrenta problema no la iha adidu traballu atu komunika ho embaixada hodi hetan apoiu nesesáriu.
Jornalista: Alexandra da Costa
Editór: Filomeno Martins
