DILI, 01 Jullu 2026 (TATOLI) – Selesaun nasionál Méxiku hatudu fali sira-nia kbiit hodi joga ho dominante tebes no konsege halakon Ekuadór ho eskoru 2-0, iha jogu faze eliminasaun 32 (32 avos final) Kopa Mundiál 2026. Vitória ne’e foti kedas Méxiku sa’e ba oitavu finál (jornada 16) iha turneiu mundiál tinan ida-ne’e.
Jogu ne’ebé hala’o iha Estádiu Azteca, Sidade Méxiku, tenke atraza ba oras ida tanba udan-boot ne’ebé tau iha estádiu laran. Apitu primeiru ne’ebé loloos tenke rona iha tuku 10:00 otl, foin rona hakat ba tuku 11:00 otl (meiudia oras Timor-Leste).
Primeira Parte: Domíniu Total no Golu Rua
Husi de’it apitu dahuluk, ekipa uma-na’in foti kedas inisiativa atake hodi hanehan deféza adversáriu nian. Oportunidade primeiru mosu iha minutu dalima liuhusi kabesa-bola Raul Jimenez nian ne’ebé sai ba li’ur, no kontinua ho suta forte hosi Gilberto Mora iha minutu 15 ne’ebé sei semo dook husi baliza.
Ekuadór mós tenta responde atake husi John Yeboah, maibé nia suta la konsege hetan alvu. Méxiku foin konsege nakfila sira-nia domíniu sai golu iha minutu 22 liuhosi Julian Quinones. Nia simu pasajen di’ak hosi Roberto Alvarado, lori bola ba área penalidade laran, no lansa xute ne’ebé guarda-rede ekuatorianu, Hernan Galindez, la konsege trava. 1-0.
Vantajen ne’e sa’e liután ba 2-0 iha minutu 30, bainhira Raul Jimenez finaliza ho loloos pasajen badak hosi asisténsia kapaz Julian Quinones nian.
Ekuadór kuaze hamenus diferensa iha minutu 39, maibé suta maka’as husi John Yeboah konsege salva hosi guarda-rede mexikanu Raul Rangel. Primeira parte termina ho eskoru 2-0 ba uma-na’in.
Segunda Parte: Defeza metin no kartaun mean
Iha segunda parte, jogu hatudu nafatin Méxiku ne’ebé domina iha inísiu, liuhusi suta Roberto Alvarado nian ne’ebé nafatin sai husi alvu. Ekuadór koko lansa kontra-atake hodi sobu defeza uma-na’in nian, maibé liña kotuk Méxiku nian metin tebes no susar atu penetra.
Méxiku kuaze aumenta golu datoluk iha minutu 67 liuhosi kabeza-bola Cesar Montes nian hosi kantu (corner), maibé guarda-rede Galindez konsege asegura ho di’ak.
Ekuadór mós hetan oportunidade di’ak ida liuhusi Kevin Rodriguez ne’ebé duni tuir pasajen naruk, maibé ninia suta iha baliza oin la tuir nafatin alvu.
Iha fali tempu adisionál (90+5′), defeza Ekuadór, Piero Hincapie, tenke simu kartaun mean hosi árbitru hafoin verifika tiha VAR, tanba halo falta todan hasoru Santiago Gimenez. To’o apitu finál, eskoru nafatin 2-0 ba vitória Méxiku nian.
Aliñasaun Jogadór
-
Méxiku [4-3-3]: Raul Rangel; Jorge Sanchez, Cesar Montes (kapitaun), Johan Vazquez, Jesus Gallardo; Erik Lira, Luis Romo, Gilberto Mora; Raul Jimenez, Julian Quinones, Roberto Alvarado.
Treinadór: Jaime Lozano.
-
Ekuadór [4-4-2]: Hernan Galindez; Piero Hincapie, Joel Ordonez, Willian Pacho, Pedro Vite; Alan Franco, Moises Caicedo (kapitaun), John Yeboah, Nilson Angulo; Enner Valencia, Gonzalo Plata.
Treinadór: Félix Sánchez Bas.
Jornalista: Hortêncio Sanchez
Editór: Rafael Ximenes de A. Belo
