DILI, 25 Juñu 2026 (TATOLI)–Governu Portugál liuhusi Casa da Moeda sei apoia Timor-Leste hodi moderniza sistema administrativu no dokumentu ofisiál hodi asegura falsifikasaun dokumentu.
Primeiru-Ministru, Kay Rala Xanana Gusmão, hala’o vizita bá Casa da Moeda Portugál, instituisaun ida-ne’ebé iha istória kle’an iha produsaun moeda, maibé ohin loron foka liu ba modernizasaun sistema seguransa no dijitalizasaun dokumentu ofisiál sira.
Durante vizita ne’e, PM Xanana haree diretamente prosesu operasaun sira iha área emisaun pasaporte, kartaun identidade no dokumentu ofisiál sira seluk, ne’ebé utiliza sistema dijitál integradu ho padraun seguransa aas.
Nune’e iha Primeiru-Ministru, Kay Rala Xanana Gusmão, observa katak sistema ne’e garante katak ema ida labele duplika dokumentu ka halo falsifikasaun, tanba baze de dadus no kontrolu seguransa dijitál iha nível ne’ebé forte tebes, inklui área sira hanesan ne’e iha restrisaun seguransa ne’ebé forte no la permite asesu arbiru ba sistema.
“Entaun vizita ne’e la’ós atu implementa imediatamente, maibé atu komprende didi’ak modelu modernizasaun ne’ebé bele sai referénsia bá Timor-Leste iha futuru tanba esperiénsia Portugál nian mós inklui apoiu ba nasaun sira seluk, hanesan Kolombia, iha área modernizasaun sistema dokumentasaun no seguransa dijitál,” Xefe Governu dehan.
Nia hatutan objetivu vizita ne’e atu haree no aprende, hodi prepara ita-nia ema, bainhira iha akordu kooperasaun, ita bele implementa ho di’ak no sistemátiku tanba prosesu ne’e la simples.
Ministru Justisa Timor-Leste, Sérgio da Costa Hornai, hateten katak aleinde kooperasaun iha área formasaun no reforma judisiária, delegasaun Timor-Leste mós fó prioridade ba dijitalizasaun no modernizasaun sistema administrativu no dokumentasaun ofisiál.
“Tanba ne’e maka durante vizita servisu iha Portugál, delegasaun ne’ebé akompaña Primeiru-Ministru mós hala’o vizita bá Casa da Moeda Portugál hodi esplora oportunidade kooperasaun iha área dijitalizasaun no jestaun baze de dadus integradu,” Ministru deklara.
Governante ne’e dehan, Governu Timor-Leste buka dezenvolve sistema dijitál ida-ne’ebé bele integra dokumentu ofisiál sira hanesan Billete Identidade, Sertifikadu Rejistu Kriminál, dadus kadástral no dokumentu administrativu seluk ne’ebé emitidu hosi Ministériu Justisa.
“Objetivu prinsipál maka atu moderniza servisu públiku no aumenta seguransa, efisiénsia no asesibilidade bá dokumentu ofisiál sira ne’ebé sidadaun sira uza loro-loron,” nia esplika.
Nune’e Governu Timor-Leste tenke buka hametin kooperasaun ho Portugál atu dezenvolve sistema modernu bá emisaun dokumentu sira, inklui pasaporte eletróniku no dokumentu identifikasaun sira seluk, atu responde bá dezafiu sira iha área ne’e.
“Vizita ne’e hanesan pasu importante ida atu hametin relasaun estratéjika entre Timor-Leste ho Portugál, liuliu iha área reforma justisa, dezenvolvimentu rekursu umanu no transformasaun dijitál ne’ebé sei kontribui ba konsolidasaun demokrasia no Estadu Direitu iha Timor-Leste iha kurtu, médiu no longu prazu,” nia konsidera.
Enkuantu iha vizita ne’e, Primeiru-Ministru Xanana Gusmão akompaña husi Ministru Justisa, Sérgio da Costa Hornai, Embaixadór Timor-Leste bá Portugál, Manuel de Araújo Serrano no Diretór-Jerál Polítika Justisa, Nelinho Vital.
Jornalista : Alexandra da Costa
Editór : Cancio Ximenes
