DILI, 03 Jullu 2026 (TATOLI)—Primeiru-Ministru no Ministru Finansa Repúblika Singapura, Lawrence Wong, hala’o enkontru bilaterál ho Prezidente Repúblika, José Ramos-Horta, no reafirma kompromisu atu kontinua apoiu malu iha nivel multilaterál.
Prezidente Repúblika, José Ramos-Horta, hateten Timor-Leste nafatin apoia Singapura iha nivel multilaterál tanba sira fiar katak Singapura iha istória naruk kona-ba kontribuisaun ne’ebé substansiál no ekilíbriu iha sistema ONU nian.
“Liuliu, agora, ami presiza nasaun hanesan Singapura atu ajuda orienta instituisaun multilaterál sira fila-fali ba sira-nia ideál orijinál hanesan diálogu internasionál, parseiru iha prevensaun konflitu no mobiliza boa-vontade no rekursu ativu atu hasoru dezafiu barak ne’ebé ita hasoru iha rejiaun no mundu,” Prezidente Repúblika afirma iha Palásiu Prezidensiál ohin.
Xefe Estadu dehan, Timor-Leste hein atu aprende husi Singapura nia esperiénsia ne’ebé folin boot tebes bainhira Timor-Leste prepara ba Timor-Leste nia presidénsia ASEAN iha 2029.
Iha biban ne’e, Primeiru-Ministru no Ministru Finansa Repúblika Singapura, Lawrence Wong, hateten ligasaun entre nasaun rua ne’e hahú kedas molok Timor-Leste hetan independénsia. Tamba Singapura nia emar na’in-1.000 mak servisu hanesan parte forsa manutensaun dame internasionál entre 1999 to’o 2012 iha periodu tranzisaun ba dame no estabilidade.
“No iha tinan hirak liubá, Singapura nia emar barak moris no serbisu hamutuk ho povu Timor-Leste, fahe esperiénsia no koñesimentu profisionál no ajuda dezenvolve kapasidade,” PM Singapura haktuir.
Nune’e Xefe Governu Singapura, afirma katak Singapura kontente tanba bele apoia Timor-Leste nia dalan ba membru ASEAN no sira nafatin apoia Timor-Leste nia intensaun atu asume responsabilidade nu’udar Prezidénsia ASEAN iha tinan 2029.
Jornalista : Alexandra da Costa
Editór : Cancio Ximenes
