BAUKAU, 06 Jullu 2026 (TATOLI)—Sidadaun mane ho inisiál ESB lakon vida hafoin monu husi ai (tua-akadiru) iha área Uai-wono, Aldeia Ossoua, Suku Tirilolo, Postu Administrativu Baukau Vila.
Tuir kronolojia, vítima sa’e tua-akadiru atu ku’a tua-mutin maibé seidauk to’o iha tutun eskada tohar halo vítima lakon kontrolu monu tun lakon vida iha lokál asidente purvolta tuku 17:00-resin iha Domingu (05/07/2026).
“Au halo ba eskada posibilidade lahuk mak tohar entaun kauza vítima monu pankada to’o hakotu-iis,” Xefe Aldeia Ossoua, Suku Tirilolo, Estevão Alfredo Belo informa liuhusi telefónema, Segunda ne’e.
Estevão relata, hafoin asidente, parte Polísia Nasionál Timor-Leste to’o kedas lokál akontesimentu hodi rekolla informasaun no koordena ho família atu transporta ba Ospitál Nasionál Guido Valadares (HNGV-sigla portugeza) atu halo autópsia maibé família rejeita.
Razaun família rejeita hodi halo autópsia tanba tuir sasin (oan mane) nia haree, vítima nia asidente ne’e laiha motivu selu.
“Asidente singulár nune’e família deside halo tuir kulturál,” Estevão hakotu.
Entretantu, vítima ESB moris iha loron 10 Maiu 1945 nu’udar agrikultór no kada loron kua tua hodi sustenta ekonomia no atualmente família hahú prepara ba prosesu fúnebre.
Jornalista: Natalino Belo
Editór: Xisto Freitas da Piedade
