VIKEKE, 06 Jullu 2026 (TATOLI)—Xefe Suku Karaubalu, Postu Vikeke Vila, Munisípiu Vikeke, João Pinto, informa ponte ne’ebé liga bá Eskola Sekundária 04 Setemtru kotuk totál hodi difikulta estudante, profesór no komunidade nia movimentu tanba laiha dalan alternativu.
“Ponte ne’e kotu kauza husi udan boot foin lalais ne’e tanba morru protesaun monu. Agora difikulta ita-nia estudante profesór no komunidade aldeia rua husi Suku Karaubalu iha mota sorin tanba laiha dalan alternativu,” João Pinto ba TATOLI iha Postu Vikeke Vila, Segunda ne’e.
Nia haktuir daudaun ne’e la udan nune’e komunidade no estudante halo movimentu sei di’ak, maibé kuandu udan boot mai ne’e ema labele liu mota referida.
Kona-ba ponte kotu, autoridade relata ona ba Servisu Ministériu Obra Públika (SMOP) Munisípiu Vikeke no tékniku sira husi SMOP Vikeke bá haree direta no rekolla ona dadus ponte nian.
Hatán ba preokupasaun ne’e, Diretór SMOP Munisípiu Vikeke, Casildo S. Gomes, haktuir SMOP Munisípiu Vikeke koordena ona ho Empreza Hoven atu halo normalizasaun emejénsia para fasilita komunidade no estudante sira, depoiz planu ba kontrusaun ponte kotu ne’e.
“Kona-ba ponte ida-ne’ebé kotu ne’e ita agora orienta ona Empreza Hoven mak atu halo normalizasaun emerjénsia,” nia haktuir.
Tuir dadus, populasaun aldeia rua husi Suku Karaubalu ne’ebé hela iha mota sorin mak hanesan Aldeia Lamak-Laran totál uma-kain 300 no Aldeia Has-Abut uma-kain hamutuk 57 inklui estudante Eskola Sekundária 04 Setembru.
Jornalista: Vitorino Lopes da Costa
Editór: Xisto Freitas da Piedade
