DILI, 06 Jullu 2026 (TATOLI)—Sala Leitura Xanana Gusmão ka Xanana Reading Room promove lian materna Kemak liuhusi kompetisaun hakerek ai-knanoik no halo tradusaun mós ba lian tetun.
Jestora Sala Leitura Xanana Gusmão, Maria Amaral Guterres, hateten objetivu husi kompetisaun ne’e atu prezerva lian materna no literatura orál Kemak nian hodi hametin identidade kulturál no matenek bei’ala sira-nian.
“Tanba ne’e Xanana Reading Room enkoraja joven, estudante sira atu uza partisipa iha kompetisaun ne’e, tanba ne’e loke ba públiku. Signifika, ema hotu bele partisipa laharee ba idade, hodi valoriza lian inan (materna) iha prosesu hakerek no aprendizajen,” Jestora ne’e informa ba Agência TATOLI iha telefone, ohin.
Tanba programa ne’e la’ós foin mak loke maibé sira loke hahú tinan 2020 no iha lian lima (5) mak sira promove ona hanesan lian Mambae, Baikenu, Makasae, Tetun Terik inklui lian Bunak no planu ba tinan oin sei promove lian materna Fataluku no Naueti.
Dirijente ne’e dehan, programa ne’e atu hakerek dokumenta ai-knanoik populár sira husi sira-nia komunidade hodi prezerva patrimóniu orál iha forma eskrita ba jerasaun foun agora no ba futuru
“Iha kompetisaun ne’e, manán-na’in dahuluk sei hetan osan ho montante $400, manán-na’in daruak hetan osan $300 no ba datolu sei hetan osan $100, ne’ebé hetan apoiu husi Sekretária Estadu Arte no Kultura (SEAK),” nia dehan.
Enkuantu aplikante sira-ne’ebé sai manán-na’in ne’e, sira-nia obra Xanana Reading Room sei prodús sai livru hodi distribui ba biblioteka parseiru sira-nian, ba eskola no rai mós iha biblioteka Sala Leitura Xanana Gusmão, hodi oferese ba leitór sira atu asesu.
Kompetisaun hakerek ai-knanoik ne’e Xanana Reading Room realiza hahú husi loron Segunda (06 Jullu 2026) ohin to’o loron 06 fulan-Setembru tinan 2026.
Jornalista : Alexandra da Costa
Editór : Cancio Ximenes
