DILI, 08 Jullu 2026 (TATOLI )—Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) halo ona identifikasaun ba jerente J-Trans ne’ebé alegadamente halo falsifikasaun dokumentu relasiona ho karta husi empreza, ne’ebé temi prezensa iha Dili tanba hetan konvite husi Prezidente Repúblika, José Ramos-Horta.
PNTL rejistu ona kazu ne’e ho númeru 0233/2026/PNSIK.
Nune’e, Jet Privadu ne’e konsege aterra iha Aeroportu Internasionál Nicolau Lobato, Komoro foin lalais ne’e no tuir planu atu tula sidadaun Indonézia na’in-tolu iha Dili, maibé la konsege tula, sidadaun estranjeiru sira ne’e halo fali viajen ho aviaun komersiál.
Portavóz PNTL, Superintendente-Xefe Polísia João Belo dos Reis, informa, Autoridade Seguransa sira bolu kedas na’in ba aviaun no Jerente Operasionál J-Trans atu fó klarifikasaun bainhira polémika ne’e mosu iha semana kotuk.
“Timoroan na’in-rua voluntáriamente mai fó deklarasaun kona-ba karta ne’ebé sira hakerek. Publikamente sira halo ona karta deklarasaun nomós husu deskulpa ba fallansu ne’ebé sira halo,” Portavós hato’o ba Jornalista sira, Kuarta ne’e.
Notísia relevante : Servisu Migrasaun klarifika entrada sidadaun indonézia na’in-tolu ho Jet Privadu
Portavós lakohi fó komentáriu kona-ba sidadaun estranjeiru na’in-tolu nia objetivu mai Dili tanba asuntu ne’e tama iha kompeténsia Servisu Migrasaun, iha prosesu investigasaun PNTL foka de’it ba alegasaun no falsifikasaun dokumentu.
Nia dehan, PNTL koordena ona ho parte Embaixada Indonézia hodi buka hatene kona-ba identidade sidadaun Indonézia na’in-tolu, ikus mai identifika katak sira hanesan emprezáriu indonéziu ne’ebé serbisu iha área ospitalidade no karvaun.
“Sidadaun na’in-tolu tama iha territóriu Timor-Leste laiha violasaun Lei Migrasaun. Ita kestiona kona-ba karta ne’ebé haruka mai,” nia akresenta.
Autoridade Seguransa halo de’it identifikasaun ba J-Trans tanba karta ne’e sai polémika tanba uza Prezidente Repúblika nia naran.
“Diresaun Servisu Investigasaun Kriminál bolu kedas ema sira ne’ebé hakerek karta atu fó klarifikasaun. Maibé, tanba investigasaun sei la’o hela, seidauk bele divulga konteúdu informasaun sira,” Portavós tenik.
Na’in ba aviaun rasik rekoñese ona katak sira halo sala no públikamente husu deskulpa.
“Investigasaun kontinua hela. Tanba PNTL halo ona Tracking no profilin ba sidadaun na’in-tolu ne’e, bolu kompaña aviasaun atu fasilita dokumentu sira no halo verifikasaun ba sasán ne’ebé tula iha aviaun. Husu maluk sira atu labele interpreta tuir ita-boot sira-nia gostu tanba autoridade sira sei halo investigasaun,” nia hameno.
Portavós reforsa, to’o agora laiha indísiu krime hasoru sidadaun Indonézia na’in-tolu ne’e tanba sira tama mai Timor-Leste ho maneira legál no iha kooperasaun ho Timoroan balun ne’ebé mak aluga aviaun Jet Privadu ba sira.
Autoridade Seguransa mós daudaun ne’e hein hela desizaun husi Ministériu Públiku molok foti desizaun legál ba na’in ba J-Trans.
“Komunikasaun entre PNTL no Ministériu Públiku la’o hela, ema sira ne’ebé envolvidu voluntáriamente fó ona deklarasaun. Espera katak prosesu investigasaun ne’e bele ramata iha loron-rua oin,” Portavós hato’o.
Jornalista : Natalino Costa
Editora : Julia Chatarina
