FAO implementa programa prioridade iha Kovalima
KOVALIMA,09 Jullu 2026 (TATOLI)-Organizasaun Nasaun Unida ba Ai-han no Agrikultura (FAO,sigla inglés), sei implementa programa prioridade ba agrikultór sira hanesan apoiu tékniku ba grupu investimentu sistema ai-han, fasilita formasaun téknika ba grupu alvú, koordena ho autoridade, fó asisténsia téknika ba grupu no fahe agrikultór sir aba kada grupu ne’ebé maka estabelesidu ona.
Koordenadór FAO Kovalima, Esmaiel Gusmão, hateten nia parte hahú iha janeiru to’o oras ne’e servisu ona ho agrikutór sira oinsá atu hasa’e produsaun ai-han iha munisípiu Kovalima.
Tuir nia hahú Janeiru to’o juñu ne’e fó ona apoiu tékniku ba grupu iha suku alvu hodi halo preparasaun rai atu kuda hare, formasaun téknika ba grupu alvu sira, hala’o enkontru ho grupu agrikultór sira hodi rona sira-nia hanoin, koordenasaun ho autoridade lokál iha área alvú foun , fó asisténsia téknika ba membru grupu ba atividade kultivasaun iha époka da-ruak no distribuisaun ekipamentu agrikóla ba grupu sira.
Alende ne’e, daudaun ne’e, FAO mós diálogu investimentu sistema ai-han nivél munisípiu no tuir planu iha fulan-oin sei realiza tan workshop nasionál hodi investe di’ak liután kona-ba sistema ai-han di’ak ba inan isin-rua no bebe sira atu bele garante saúde ne’ebé di’ak ba inan no oan durante bebe iha inan nia kabun.
Aleinde ne’e reabilitasaun centru rekursu iha sanfuk no iha Zumalai no mós hamutuk ho servisu munisipál agrikultura Kovalima hodi implementa atividade hodi halo reabilitasaun sentru apoiu husi FAO.
Organizasaun Nasaun Unida ba Ai-han no Agrikultura ne’e mós reabilita Sentru Rekursu Sanfuk no iha Zumalai no kolabora hamutuk ho Servisu Munisipál Agrikultura hodi halo reabilitasaun ba Sentru apoiu husi FAO.
Maibé nia dehan dezafiu sira ne’ebé nia parte hasoru maka problema mudansa klimátika no komunidade sira-nia animal husik livre hodi estraga toos iha suku alvu sira ne’ebé FAO implementa iha terrenu.
Iha sorin seluk Prezidente Autoridade Munisípiu Kovalima, Miguel Armada Cardoso, hateten lei movimentu animál nùmeru 12/2014 no lei nùmeru 8/2008 kona-bá movimentu animál nune’e sei implementa ho rigór ba futuru.
“Ho nune’e ha’u hasai ona sirkulár atu ema hotu tenke kumpre ita elabora hela regulament,”nia hateten.
Entertantu, Programa ne’e implementa iha postu administrativu Zumalai iha Suku Tashilin, Fatuleto, Lour, Mape. Iha postu administrativu Suai iha suku Suai Loro, Debos no Beco no introdusaun halo inovasaun agrikultura hodi halo inovasaun produsaun ai-han estrume verde ba kultivasaun hare no fó asisténsia téknika ba membru grupu sira ba atividade kultivasaun iha epoka da-ruak ni’an.
Jornalista:Celestina Teles
Editór: Florencio Miranda Ximenes.
