BAUKAU, 10 Jullu 2026 (TATOLI)—Serbisu Munisipál ba Terra no Propriedade Kadastrál (SMTPK) iha inísiu tinan ne’e hahú halo levantamentu ba rai Estadu ne’ebé lokaliza iha área urbana, Postu Baukau Vila, Munisípiu Baukau.
Diretór SMTPK Baukau, Amon Bernardino da Costa Correia, esplika prosesu levantamentu patrimóniu Estadu referida faze dahuluk lokaliza iha suku rua hanesan Tirilolo no Bahú tanba maioria abandonada no utiliza husi komunidade.
“Agora daudaun ita nafatin halo identifikasaun ba rai no uma Estadu, iha parte Bugaiti nian, Suku Tirilolo no planu atu kontinua ba eis rezisténsia DPR Vila Nova nian,” Amon Correia hateten iha ninia kna’ar Vila nova, Sesta ne’e.
Nia relata tékniku sira rekolla ona dadus iha área Bahú no atuál kontinua iha Suku Tirilolo, iha-ne’ebé kobre mós parte Rumah Sangat Sederhana ( RSS) nu’udár pasu atu hatene totalidade rai no uma Estadu iha Baukau.
Aleinde ne’e, parte Terra no Propriedade halo ona levantamentu maibé seidauk klaru, tanba iha sistema sei kahur malu entre privadu no Estadu nune’e re-levanta fali hodi hafahe iha sistema nune’e bele hatene totalidade rai Estadu husi nivel aldeia to’o munisípiu.
“Iha momentu ida-ne’e ita la asesu dadus jerál entaun ita buka mekanizmu ne’e para rejista fali,” Amon Correia akresenta.
SMTPK rasik iha meta sei termina prosesu levantamentu patrimóniu Estadu iha Baukau iha tinan ne’e maibé posibilidade sei estende kauza menus fasilidade servisu hanesan komputadór, transporte no rekursu umanu.
Entretantu, SMTPK rasik seidauk fó-sai dadus loloos rai no uma Estadu hamutuk ho kategoria sira iha Munisípiu Baukau tanba sei iha faze levantamentu.
Jornalista: Natalino Belo
Editór: Xisto Freitas da Piedade
