Ponta Leste halakon Lemocor ho pontu 53-31
DILI, 11 Jullu 2026 (TATOLI) – Ekipa Ponta Leste hatudu jogu di’ak iha Liga Nasionál Basketeból Timor-Leste hodi halakon Lemocor ho pontu 53-31.
Kompetisaun ne’ebé realiza iha Jináziu Dili, iha sábadu kalan ne’e, Ponta Leste hatudu performe di’ak no kontrola jogu husi kuarter dahuluk, ne’ebé remata ho shutout 13-0.
Sira aproveita oportunidade husi foult no lansa bola barak liu husi área li’ur ka 3 point shoot, enkuantu defeza maka’as halo Lemocor labele marka pontu ida durante jogu.
Tama ba kuarter daruak, Ponta Leste nafatin domina jogu no aumenta pontu ba 27-0. Lemocor hasoru difikuldade atu kontrola bola no halo turnovers barak ka pasa sala bola. Maski hetan oportunidade husi free throw, sira la konsege ezekuta ho di’ak no remata kuarter daruak ne’e ho pontu 0.
Iha kuarter datoluk, Lemocor konsege marka pontu dahuluk no hahú hadi’a nia ritmu jogu. Maibé diferensa pontu ne’ebé boot liu halo sira susar atu duni tuir. Kuarter ne’e hotu ho pontuasaun 37-18 ba Ponta Leste.
Iha kuarter ikus, Ponta Leste mantein sira-nia jogu no hetan vitória ho 53-31. Lemocor tenta luta to’o apitu finál, maibé Ponta Leste nia defeza no atake ne’ebé di’ak “halo terus” Lemocor iha jogu ne’e. To’o finál, Ponta Leste sai vensedór ho diferensa pontu 22.
Ho rezultadu ne’e, Ponta Leste hatudu sira hanesan ekipa ida ne’ebé maka’as, halo defeza di’ak, no aproveita oportunidade durante jogu.
Notísia relevante: Liga Nasionál Basketeból: Savarika mane no AD SLB feto sai vensedór
Jornalista: Hortêncio Sanchez
Editora: Maria Auxiliadora
