DILI, 13 Jullu 2026 (TATOLI)—Governu hahú realiza reuniaun interministeriál hodi diskute kona-ba ezbosu planu estratéjiku mediu prazu tinan 2027-2030 liuliu ba setór institusionál, ekonómiku, sosiál no infraestrutura.
Objetivu prinsipál husi reuniaun interministeriál ezbosu Planu Mediu Prazu (PMP) Governu 2027-2030 mak atu orienta faze finál husi Planu Estratéjiku Dezenvolvimentu (PED) 2011-2030 no ida-ne’e foka liu ba definisaun prioridade nasionál no armonia orientasaun estratéjika husi ministériu oioin hodi alkansa meta dezenvolvimentu sustentável.
Ministru Planeamentu Investimentu Estratéjiku, Gastão Sousa, hateten iha reuniaun Konsellu Ministru iha kuarta semana kotuk aprezenta ekipa independente ida atu halo aprezentasaun kona-ba implementasaun planu estratéjiku dezenvolvimentu 2011-2030.
“Saida mak ita tenke prepara atu identifika programa propriedade sira hodi envolve iha planu médiu prazu 2027-2030, maibé iha programa barak ne’ebé mak ita seidauk halo no balun halo ona (ezekuta) tuir meta jerál hamutuk 199,” Ministru Planeamentu Investimentu Estratéjiku, Gastão Sousa, informa ba jornalista sira iha Palásiu Governu, ohin.
Governante ne’e dehan, to’o 2030 saida mak ita presiza halo liuliu foka ba setór haat hanesan setór dezenvolvimentu ekonómiku, setór dezenvolvimentu sosiál, setór dezenvolvimentu institusionál no setór dezenvolvimentu infraestrutura.
“Ohin konvoka reuniaun ne’e hodi haree kona-ba setór dezenvolvimentu institusionál hanesan Jjustisa, interior, defeza seguransa, finansa públika inklui dezentralizasaun. Tanba orsamentu 2027 ka PAA tenke refleta ona ho baze ba planu médiu prazu,” nia dehan.
Nia hatutan, hafoin finaliza reuniaun interministeriál ne’e sira hotu sei aprezenta relatóriu finál ba Konsellu Ministru hodi alkansa ba oin.
Detallu Xave kona-ba Prosesu Planu Médiu Prazu 2027-2030:
- Objetivu Estratéjiku: Atu garante katak PMP sai dokumentu planeamentu ne’ebé forte, inkluzivu no alinha ho prioridade nasionál sira nune’e bele atinje estatutu país ho rendimentu médiu-altu.
- Setór Kuadru Institusionál: Lidera husi Ministru Prezidénsia Konsellu Ministrus, Agio Pereira, hodi koordena esforsu hamutuk ho Ministériu Planeamentu no Investimentu Estratéjiku (MPIE).
- Ekipa Partisipante: Envolve mós Ministériu Interiór, Ministériu Administrasaun Estatál, Ministériu Finansas, Ministériu Justisa, Ministériu Defeza, Ministériu Negósius Estranjeirus no Kooperasaun, no Komisaun Funsaun Públika.
- Bazeia ba Avaliasaun: Planu foun ne’e kontinuasaun husi Relatóriu Monitorizasaun ba Progresu PED 2011- 2030 ne’ebé avalia ona ezikusaun meta sira.
Enkuantu, durante reuniaun kada lina ministeriál halo aprezentasaun ba ida-idak nia ezbosu planu servisu nian iha tinan 2027 to’o 2030.
Jornalista : Alexandra da Costa
Editór : Cancio Ximenes
