DILI, 13 Jullu 2026 (TATOLI)—Tribunál Judisiál Primeira Instánsia Dili (TJPID) liuhusi Juíz Ivan Patrocino, Segunda ne’e, deside aplika medida kausaun $3.000 no medida proibisaun auzénsia ba arguidu na’in-96, ne’ebé suspeitadu envolve kazu online scam iha Bebonuk.
Ekipa konjunta kompostu husi Ekipa Polísia Sientífika Investigasaun Kriminál (PCIC, sigla portugéz), Servisu Sekreta, no Polísia Nasionál Timor-Leste (PNTL), iha Kuarta (08/07) besik tuku 00:00, asegura sidadaun Xina no Kambódia iha uma aluger ida ne’ebé lokaliza iha área Bebonuk, Postu Administrativu Dom Aleixo, Munisípiu Dili.
Durante operasaun, Autoridade Seguransa sira halo apreensaun ba sasán eletróniku barak, inklui komputadór hamutuk unidade 88, laptop unidade 13 no telemóvel ne’ebé uza hanesan evidénsia ba investigasaun.
Juíz Ivan Patrocino liuhusi despaisu deside aplika medida ba arguidu sira hanesan garantia ida atu sira labele halai sai, karik sira halai sai maka osan ne’e afavór ba Estadu.
Tribunál mós fó prazu loron-10 ba iha arguidu sira atu selu kausaun, hahú sura husi hasai despaisu ne’e, karik arguidu sira la selu mak Trubunál sei halo fali alterasaun husi medida kausaun ba medida prizaun preventiva.
Iha Tribunál nia despaisu ne’e mós aplika medida proibisaun auzénsia, ho nune’e autoriza PCIC atu asegura arguidu sira-nia pasaporte hodi hein prosesu investigasaun tuirmai.
Notísia relevante : PCIC asegura tan ema na’in-110 iha Bebonuk suspeitadu envolve prátika online scam
Deside mós atu arguidu sira kontinua mantein medida Termu Identidada Rezidénsia (TIR) ne’ebé antes ne’e iha ona.
Ministériu Públiku (MP) iha kazu ne’e promove arguidu sira ho krime Jogu ilísitu, Asosiasaun Kriminoza, Brankamentu Kapitais, nonBurla Informatika.
Iha interrogatóriu dahuluk ba arguidu na’in-96, iha alegasaun, MP husu ba Tribunál atu aplika medida proibisaun auzénsia no medida $3.000 ba kada arguidu. Enkuantu ba arguidu na’in-ida MP husu Tribunál atu aplika medida kausaun $5.000 tanba nia suspeitadu hanesan jerente atividade online scam iha área Bebonuk.
Parte Defeza ba arguidu na’in-neen sira, Advogadu Privadu Pedro Camões, aseita MP nia alegasaun.
Enkuantu, Defeza ba arguidu na’in-90, Advogadu Privadu, Octávio Cardoso no Januário Martins husu ba Tribunál atu aplika medida proibisaun auzénsia no medida kausaun $2.000 ba nia kliente sira.
Prosesu interrogatoriu dahuluk ne’e prezide husi Juiz Ivan Patrocino, MP reprezenta husi Prokuradór João Marques, arguidu sira hetan asisténsia legál husi Advogadu Privadu na’in-tolu hanesan Pedro Camões, Januário Martins, no Octávio Cardoso.
Jornalista : Natalino Costa
Editora : Julia Chatarina
