BAUKAU, 16 Jullu 2026 (TATOLI)—Autoridade Suku Abu, Postu Administrativu Matebian, Munisípiu Vikeke, hamutuk ho FALINTIL-Forsa Defeza Timor-Leste (F-FDTL) realiza serimónia kulturál nu’udár parte preparasaun ba selebrasaun loron FALINTIL ba da-51 (20 Agostu 1975-20 Agostu 2026).
Xefe Suku Abu, Fidélio Sarmento dos Santos, hato’o agradesimentu ba Governu liuhusi Ministériu Defeza no FALINTIL-FDTL ne’ebé deside área Sobasula sai fatin ba komemorasaun loron FALINTIL.
“Serimónia rituál ne’e atu husu lisensa ba matebian sira atu labele hetan dezastre ruma bainhira realiza selebrasaun loron nasionál FALINTIL 20 Agostu,” Xefe Suku Abu hateten iha Sobasula, Kuarta ne’e.
Fidélio dos Santos relata serimónia lisensa referida lidera husi lian-na’in iha Postu Matebian no kontinua halo preparasaun kampu parada (isár bandeira) ektár ida komanda husi Xefe Estadu Maiór FALINTIL-FDTL, Brigadeiru Jenerál José da Costa Soares ‘Trix’ hanesan utiliza mákina pezada no membru F-FDTL.
Aleinde ne’e, autoridade suku no postu hamutuk ho komunidade kompromete apoia ba prosesu tomak hahú husi serimónia kulturál, preparasaun to’o fó susesu ba atividade selebrasaun loron nasionál referidu ne’ebé konsideradu nu’udár istóriku iha Timor-Leste.
“Sei hadi’a estrada nune’e fasilita bainaka sira to’o iha fatin serimónia,” Fidélio dos Santos informa.
Entretantu, prosesu serimónia kulturál hola-parte uma-lisan hamutuk sanulu-resin ne’ebé rezulta naan-aten hatudu sinál pozitivu no partisipa husi dirijente administrasaun munisipál, postu, suku, lian-na’in no komunidade.
Jornalista: Natalino Belo
Editór: Xisto Freitas da Piedade
