DILI, 16 Jullu 2026 (TATOLI)-Bank Rakyat Indonesia (BRI) Timor-Leste konfirmadu sai Patrosinadór Prata ba eventu Maratona Internasionál Dili 2026 ne’ebé sei realiza iha Agostu tinan ida-ne’e.
Tuir nota imprensa ne’ebé Tatoli asesu, Komisaun Organizadora Maratona Internasionál Dili 2026 sai patrosinadór ba eventu ne’e hodi aumenta apoiu importante husi setór privadu ba plataforma desportiva internasionál ne’ebé vizivel liu iha Timor-Leste.
Jerente Jerál BRI Timor-Leste, Ahmad Zaky, hateten BRI sente onradu atu apoia eventu desportivu internasionál ne’ebé prestijiozu iha Timor-Leste.
“Ami haree Maratona Internasionál Dili nu’udar eventu importante ida ne’ebé halibur ema husi nasaun, kultura, no orijen oioin no iha tempu hanesan kontribui ba turizmu, negósiu lokál sira, no perfíl internasionál nasaun nian. Liuhusi parseria ne’e, ami reafirma ami-nia kompromisu atu sai parseiru bankáriu fiar-metin ida ne’ebé apoia progresu no dezenvolvimentu Timor-Leste nian”, Ahmad Zaky dehan.
Nia salienta katak durante tinan barak nia laran, Maratona Internasionál Dili sai nu’udar eventu anuál prinsipál ida Timor-Leste nian, hodi ajuda atu projeta laran-luak, ospitalidade, no kapasidade organizasionál nasaun nian ba audiénsia internasionál ne’ebé kontinua aumenta.
Tuir nia, edisaun 2026 sai signifikativu liu tanba eventu ne’e atinje to’o nia edisaun dalan ba da-10, marka importante ida ne’ebé reflete kontinuidade no ambisaun.
Parseria ne’e lori BRI Timor-Leste tama ba grupu instituisaun sira ne’ebé apoia edisaun ba da-10 husi Maratona Internasionál Dili, ne’ebé sei akontese iha loron 08 Agostu 2026 iha Dili.
Prezidente José Ramos-Horta, nu’udar Patronu ba Maratona Internasionál Dili 2026, lori nia naran no Komité Organizadór hateten simu ho laran-luak BRI Timor-Leste nu’udar Patrosinadór Prata ba Maratona Internasionál Dili 2026.
Nia dehan apoiu ne’e nu’udar parseria metin ho setór privadu mak esensiál ba susesu iha prazu naruk ba eventu boot sira hanesan ne’e, no apoiu husi BRI Timor-Leste sai nu’udar kontribuisaun folin-boot ida ba kreximentu kontínua husi maratona ne’e.
“Maratona Internasionál Dili la’ós de’it kompetisaun halai ida, ida-ne’e mak selebrasaun ida ba saúde, komunidade, orgullu nasionál, no fatin Timor-Leste nian iha palku internasionál. Ami agradese ba BRI Timor-Leste tanba hola parte iha esforsu ne’e”, dehan.
Ho apoiu husi parseiru sira hanesan BRI Timor-Leste, maratona tinan ida-ne’e iha objetivu mak atu oferese esperiénsia ne’ebé forte liután ba atleta, apoiante, no públiku sira, hodi kontinua harii perfíl Timor-Leste nian nu’udar destinu ida ba desportu no turizmu internasionál.
Maratona Internasionál Dili koñesidu luan nu’udar eventu halai internasionál prinsipál iha Timor-Leste. Maratona ne’e espera atu atrai partisipante liu na’in-5.000 husi nasaun 30-resin ba perkursu ida ne’ebé sertifikadu husi World Athletics no hetan akreditasaun husi AIMS iha tasi-ibun sidade kapitál nian.
La’ós de’it atu apoia atividade loron kompetisaun nian, patrosíniu BRI Timor-Leste mós kontribui ba realizasaun eventu luan ida ne’ebé promove saúde públika, desportu, turizmu, partisipasaun komunitária, no imajen internasionál Timor-Leste nian.
Edisaun 2026 ne’e organiza husi Federação de Timor-Leste de Atletismo (FTA) sob patrosíniu husi Prezidente José Ramos-Horta no lori tema: “Hadomi Ita-nia Ai-laran no Animál Fuik sira.”
Eventu ba tinan ida-ne’e inklui kategoria halai haat, mak maratona kompleta 42.195 km, Meia-Maratona 21.1 km, eventu Para-Atleta sira 10 km, no halai ksolok (Fun Run) 5 km.
Kompetisaun 2026 nian mós sei aprezenta melloria profisionál oioin ba eventu ne’e, inklui teknolojia kronometrajen eletróniku MYLAPS, medisaun perkursu ho akreditasaun internasionál, no foku ne’ebé metin liu ba preparasaun atleta sira no aprezentasaun eventu.
Maratona Internasionál Dili kontinua buras la’ós de’it nu’udar eventu desportivu, maibé mós nu’udar plataforma nasionál ida ne’ebé halibur atleta de elite sira, halai-na’in rekreasionál sira, parseiru dezenvolvimentu sira, patrosinadór sira, média, voluntáriu sira, no públiku em jerál. Apoiu husi parseiru komersiál no institusionál sira nafatin esensiál atu garante katak eventu ne’e realiza ho profisionál no asesivel ba partisipante sira husi Timor-Leste no rai-li’ur.
BRI Timor-Leste fó apoiu ba eventu ida ne’ebé reflete enerjia, disiplina, inkluzaun, no optimizmu, valór sira ne’ebé aliña besik ho espíritu maratona nian no ambisaun desportiva Timor-Leste nian ne’ebé buras daudaun.
Notísia relevante: SEKOMS orienta Tatoli-RTTL halo kobertura másima ba DIM 2026 no Konferénsia Nobel ba Pás
Jornalista: Arminda Fonseca
Editora: Maria Auxiliadora
