OEKUSI, 16 Jullu 2026 (TATOLI) – Komisaun Funsaun Públika (KFP), kinta ne’e, atribui sertifikadu apresiasaun no sertifikadu durasaun serbisu ba funsionáriu reformadu na’in-49 iha Rejiaun Administrativa Espesiál Oekusi Ambeno (RAEOA).
Komisáriu Komisaun Funsaun Públika Portefóliu ba Asuntu Pensaun Reforma, Jorge Paiva Araújo, informa katak atribuisaun ne’e tuir loloos realiza antes ona maibé tanba despedida hala’o ona iha loron 18 Dezembru 2025 iha munisípiu Aileu. Razaun, parte KFP sei selebra akordu ida ho Institutu Nasionál Seguransa Sosiál (INSS) kona-ba asuntu reforma nian.
“Sertifikadu ne’e atu fó onra boot ba éroi sira ne’ebé durante ne’e fó an ba administrasaun Timor-Leste, entaun sertifikadu ne’e nu’udar rekoñesimentu memória no evidénsia ida, maske kada fulan simu direitu hanesan pensionista, maibé Estadu mós tenke rekoñese, hodi fó mós rekoñesimentu ho sertifikadu apresiasaun,” nia hateten iha salaun administrasaun Numbei, ohin.
Notísia relevante:Funsionáriu reformadu Oekusi prontu devolve osan Estadu maibé graduál
Komisáriu ne’e, esplika atribuisaun sertifikadu ne’e iha tipu rua, ida kona-ba durasaun tempu serbisu asina husi Prezidente KFP no sertifikadu apresiasaun asina direita husi Primeiru-Ministru, Kay Rala Xanana Gusmão, ho tanba funsionáriu públiku sira-ne’ebé reforma ona ne’e, sira mós hola parte iha elementu ba iha administrasaun públika ba iha órgaun ezekutiva nian.
“Entaun semak lidera órgaun ezekutiva ne’e maka Primeiru-Ministru, entaun Primeiru-Ministru maka valoriza sira-nia serbisu, ne’e maka ohin loron ita mai fahe iha Oekusi,” nia hateten.
Notísia relevante:Funsionáriu reformadu na’in-1.985 simu sertifikadu apresiasaun
Iha biban ne’e, funsionáriu reformadu Daniel Mauno, sente onradu tanba Governu ho Estadu fó rekoñesimentu ba dedikasaun.
“Bainhira ha’u rona esklaresimentu ohin, buat ida ha’u sente onradu tebes, tanba iha sertifikadu ida, atu valoriza ami-nia kontribuisaun durante sai nu’udar funsionáriu públiku, sertifikadu ne’ebé asinadu pelu Primeiru-Ministru, ida ne’e sente onradu no kontente tanba Estadu no Governu bele valoriza ita, ne’e hanesan agradesimentu boot ida ba ami, ne’ebé ami sente iha valór aas liu ba ami,” nia orgullu.
Entretantu, tuir dadus husi Komisaun Funsaun Públika (KFP) to’o 2025, funsionáriu ne’ebé reforma hamutuk na’in-1.985
Jornalista: Abílio Elo Nini
Editór: Rafael Ximenes de A. Belo
