DILI, 16 Jullu 2026 (TATOLI)–Tribunál Judisiál Primeira Instánsia Dili (TJPID), Kinta ne’e, hala’o interrogatóriu dahuluk ba arguidu ne’ebé suspeitadu ba atividade scam iha Kampung Baru.
Iha prosesu ne’e, Juíz Turnu halo identifiksaun ba arguidu na’in-14, maibé arguidu sira hili direitu nonok.
Iha alegasaun, Ministériu Públiku (MP) ne’ebé reprezenta husi Prokuradór, João Marques, solisita ba Tribunál atu aplika medida proibisaun auzénsia no medida koasaun aprezentasaun períodika ba arguidu na’in-rua no medida kausaun valór kuantia $3.000 ba kada arguidu.
Maibé, arguidu nia defeza rasik la aseita ho MP nia alegasaun, tanba konsidera osan ho valór boot liu, nune’e Tribunál husu atu redús nia montante tanba haree ba arguidu sira-nia kapasidade finanseira.
Notísia relevante : Defeza husi suspeitu na’in-tolu ba kazu scam hato’o pedidu habeas korpus ba Tribunál
Hafoin rona parte hotu, Tribunál liuhusi Juíz Turnu, Marcelino dos Santos, deside hodi aplika medida koasaun aprezentasaun períodika semana ida dala-rua, nune’e arguidu sira iha obrigasaun aprezenta-na, iha Postu Polísia besik.
Iha Tribunál nia despaisu mós aplika medida proibisaun auzénsia ba arguidu sira.
Nune’e, Tribunál nia despaisu aplika medida kausaun $2.200 ba arguidu durante loron-20 nia laran, sura husi despaisu fó-sai.
“Medida proibisaun auzénsia, medida koasaun aprezentasaun períodika semana ida dala-ida iha Postu Polísia ne’ebé mak besik no medida kausaun $2.500 ba kada ema,” Advogadu Privadu, Januário Martins, informa.
Jornalista : Natalino Costa
Editora : Julia Chatarina
