DILI, 17 Jullu 2026 (TATOLI)—Tinan sanulu resin sia liubá, Lionel Messi ajuda fó haris ba bebé Lamine Yamal ba nesesidade halo kalendáriu karidade nian ida. Agora, sira na’in rua hamriik hasoru malu iha finál Kopa Mundiál 2026.
Bainhira atu besik finál Kopa Mundiál 2026 entre Arjentina no España, fotografia tuan Lionel Messi hamutuk ho bebé ida viral fila-fali iha rede sosiál. Iha imajen ne’e, Messi ne’ebé sei haki’ak nia fuuk naruk ne’e, tuur hakruuk iha basia plástiku ida-ne’ebé nakonu ho bee.
Lionel Messi ninia liman kaer-hamaus hela bebé ida-ne’ebé tuur iha basia laran ne’e, no iha nia sorin hamriik hela bebé ne’e nia inan naran Sheila Ebana.
Bebé referida mak Lamine Yamal, jogadór Barcelona no ekipa selesaun nasionál España nian ne’ebé sai jogadór prinsipál ne’ebé sei lori ninia nasaun España atu ba finál Kopa Mundiál 2026.
Fotografia ne’e la’ós manipulasaun husi Artifisiál Inteleijénsia (AI) no montajen ne’ebé halo atu hamanas jogu ruma. Maibé momentu ida-ne’e akontese tebes iha tinan 2007 iha sesaun hasai fotografia ba kalendáriu karidade ida iha kuartu troka nian iha Estádiu Camp Nou, Barcelona.
Iha biban ne’eba, Messi ho idade tinan 20. Entretantu, Yamal ne’ebé moris [tuir dadus ofisial husi FC Barcelona] iha 13 Jullu 2007 foin mak ho idade fulan hira nia laran, Tanba ne’e, ida loloos ne’e la’os “idade fulan neen”, maibé “bebe ho idade fulan hira nia laran”.
Atu besik tinan 19 hafoin fotografia ne’e hasai, Messi idade tinan 20 hafoin fotografia ne’e hasain, Messi no Yamal sei luta hamutuk iha kampu ne’ebé hanesan. Maibé, iha biban ida-ne’e, sira na’in-rua (2) sei haatus uniforme (farda) husi nasaun diferensa bainhira Arjentina hasoru Espeña iha finál Kopa Mundiál 2026, Domingu (19 Jullu 2026), iha East Rutherford, New Jersey, Amérika.
Hahú husi kalendáriu karidade nian
Fotografia Messi no Yamal nu’udar parte ida husi kalendáriukaridade nian edisaun 2008 ne’ebé halo husi Fundasaun FC Barcelona hamutuk ho jornál Sport. Programa anuál ne’e hala’o tiha ona hahú husi tinan 2004 atu halibur fundu ba United Nations International Children’s Emergency Fund (UNICEF) ka Fundu Nasaun Unida ba Labarik sira no atividade sosiál fundasaun nian.
Kalendáriu edisaun 2008 hamosu programa akompañamentu ba labarik sira iha nasaun oioin. Jogadór prinsipál sira husi Barcelona mós envolve mak hanesan Xavi Hernández, Deco, Bojan Krkic no Rafael Márquez.
Família Yamal hetan oportunidade partisipa hasai forografia hafoin manán sorteiu ne’ebé UNICEF realiza iha área Rocafonda, Mataró, fatin sira hela ba. Labarik sira no sira-nia famíla koloka hamutuk ho jogadór Barcelona.
Ho akontese de’it, família Yamal hetan par ho Lionel Messi. Iha tempu ne’eba, laiha relasaun pesoál entre Messi no família bebé [Yamal] ne’e. Sira hasoru malu ne’e tanba de’it ba nesesidade atu halo ba kalendáriu karidade nian ne’e.
Fotógrafu Joan Monfort maka hetan oportunidade hasai fotografia sesaun entre Messi no bebé Yamal ne’e. Konseitu ida mak hatuur bebé Yamal iha basia plástiku ida-nia laran, entretantu Messi nia pozisaun hodi ajuda atu fó haris ba bebé Yamal. No, iha fotografia seluk ne’e jogadór Arjentina, Messi, kous hela bebé Yamal.
Sheila Ebana, Yamal nia inan, akompaña nia oan Yamal durante iha sesaun hasai fotografia ida-ne’e. Inan ida-ne’e ninia prezensa mós sei bele haree iha fotografia bainhira Messi hakruuk iha basia ne’e nia oin.
Messi sente moe
Iha sesaun hasai fotografia ne’e la la’o lais no susesu. Fotógrafu Monfort lembra katak Messi ne’e joben ida-ne’ebé nonook no moe-teen. Messi, jogadór ne’ebé ho idade tinan 20 ne’e konfuzaun bainhira tama iha fatin troka nian no nia hetan basia plástiku ida-ne’ebé bee iha laran ho bebé ida tuur iha laran.
Messi mós seidauk toman kous bebé. Depois Monfort fó instrusaun ka fó-hanorin to’o jogadór foinsa’e husi Barcelona ne’e hahú sente seguru halo interasaun ho Yamal.
“Nia [Messi] husi hahú lahatene maneira oinsá kous bebé,” Monfort hateten bainhira lembra fali prosesu hasai fotografia ne’e.
Iha biban ne’eba, Messi kuñesidu sai hanesan talentozu boot ida iha Barcelona. Maibé, ninia kareira seidauk atinje ba atinjimentu boot ida-ne’ebé hafoin halo Messi sai jogadór di’ak-liu iha tempu naruk.
Iha parte seluk, Yamal hanesan bebé ida husi família ida iha Mataró. Laiha ema ida iha fatin troka nian iha Camp Nou ne’ebé hatene katak bebé Yamal ne’e iha lorona anab sei hakat tuir Messi nia ain-fatin tama ba akademia La Masia, halimar ba ekupa prinsipál Barcelona, no sao jogadór prinsipál ba ninia nasaun.
Viral fila-fali iha 2024
Forografia Messi fó hariis bebé Yamal ne’e arkiva durante tinan 16 nia laran no hafoin fotografia ne’e haknauk ema barak nia atensaun iha tinan 2024. Yamal nia aman, Mounir Nasraoui, publika fali fotografia ida iha ninia Instagram ho nota ka diskrisaun badak ida “hahú husi lenda na’in-rua”.
Publikasaun ne’e mosu bainhira Yamal sai jogadór iha selesaun nasionál España nian iha Kopa Europa 2024. Tanba hasoru malu ida-ne’e hanesan hasoru malu nune’e de’it, nuna’e ema barak ne’ebé uza rede sosiál ne’e sente katal forografia ne’e rezulatdu husi manipulasaun dijitál ka manipulasaun husi Artifisiál Intleijénsia (AI).
Hafoin ne’e, Associated Press hahú buka tuir fotografia ne’e husi ne’ebé no maihusi ne’ebé no halo entrevista ba fotógrafu Joan Monfort. FC Barcelona mós konfirma katak fotografia ne’e maihusi projetu kalendáriu karidade nian husi fundasaun FC Barcelona.
Portál ofisiál klube Barcelona mosu ho sira-nia artigu “Magical Photo by the FC Barcelona Foundation” ka “Fotografia Espesiál husi Fundasaun FC Barcelona”, ne’ebé públika iha 10 Jullu 2024. Klube ne’e hateten katak Messi no bebé Yamal akontese nune’e de’it liuhusi projetu sosiál husi fundasaun.
Monfort rasik foin hatene bebé ne’e nia identidade iha fotografia ne’e hafoin ninia belun ida manda mensajen bainhira forografia hahú viral ona. Durante tinan naruk, nia la sente katak bebé ne’ebé nia hasai nia forografia hamutuk ho Messi ne’e, agora sai foinsa’e no sai jogadór prinsipál iha Barcelona no España.
Yamal Tinan 19
Yamal foin selebra niniaa aniversáriu ba da-19 iha loron 13 Jullu 2026, loron ida antes iha semi-finál España hasoru Fransa. Bainhira final hala’o iha loron 19 Jullu 2026, Yamal halo ona idade tinan 19 no loron neen.
Tinan ne’e halo nia sai jogadór terseiru ne’ebé kiik-liu ne’ebé nunka joga iha final Kopa Mundiál, tuir de’it Pelé (17) no Giuseppe Bergomi (18). Nia mós sei kiik-liu Kylian Mbappé bainhira nia joga ba Fransa iha finál Kopa Mundiál 2018.
Messi, iha sorin seluk, tama ba finál ho tinan 39. Diferensa idade ne’ebé besik dekada rua halo partida entre Argentina no Espana sai hanesan enkontru ida entre etapa rua karreira ne’ebé diferensa.
Iha tinan 2007, fotógrafu Joan Monfort grava-metin Messi ajuda fó haris no hakuak bebé Lamine Yamal iha kuartu troka nian ida iha Camp Nou. Iha loron 19 Jullu 2026, fotógrafu sira sei see fila-fali sira-nia kámara ba sira na’in-rua (Messi no Yamal) ne’e bainhira Arjentina no España sei hasoru malu iha jogu finál Kopa Mundiál 2026 iha New Jersey.
Jornalista : Hortêncio Sanchez
Editór : Cancio Ximenes
