SÃO TOMÉ E PRÍNCIPE, 17 Jullu 2026 (TATOLI) – Missaun Observasaun Eleitorál (MOE) g7+ halo observasaun ba kampaña eleisaun prezidensiál ikus iha São Tomé e Príncipe husi kandidatu Nito D’Abreu, ne’ebé realiza besik arredór Estádio Nasionál 12 de Julho, iha kapitál São Tomé, ho partisipasaun husi apoiantes sira ne’ebé mai husi munísipiu, inklui husi partidu polítiku balu.
Komísio ikus kampaña ne’e hala’o iha ambiente festivu no pasífiku, ho apoiante rihun ba rihun halo nakonu área besik estádiu atu fó apoiu ba sira-nia kandidatu. Durante atividade ne’e, tuir observasaun Tatoli nian, la rejista asaun konflitu ka violénsia, no mobilizasaun la’o ho hakmatek no dmae.
Eventu ne’e inklui mós apresentasaun músika, animasaun kulturál no diskursu polítiku husi apoiadór sira antes kandidatu Nito D’Abreu halo intervensaun ikus ba nia eleitór sira.
Iha nia komísiu, Nito D’Abreu agradese apoiu ne’ebé simu durante nia kandidatura, inklui apoiu husi partidu polítiku seluk ne’ebé fó apoiu ba nia kandidatura, no agradese mós ba apoiu husi sidadaun São Tomé ne’ebé hela iha diáspora.
Kandidatu ne’e promete katak, bainhira eleitu nu’udar Prezidente Repúblika, nia sei sai líder ida ne’ebé besik ba nia sidadaun hotu-hotu, la haree ba diferensa polítika.
“Ha’u sei sai Prezidente ba ema hotu-hotu iha São Tomé e Príncipe,” afirma Nito D’Abreu, haktuir katak nia sei halo prezidénsia ne’ebé besik liu ho povu, liuhusi vizita no diálogu direta atu hatene problema no nesesidade komunidade sira-nian.
MOE g7+ sei kontinua observa prosesu eleisaun iha São Tomé e Príncipe, inklui atividade kampaña, loron votasaun, prosesu kontajen votu no apuramentu rezultadu eleisaun prezidensiál ne’ebé sei hala’o iha 19 Julhu 2026.
Notísia relevante: Ministru Finansa São Tomé e Príncipe konsidera g7+ parseiru importante ba demokrasia
Jornalista: Afonso do Rosário
Editora: Isaura Lemos de Deus
