BOBONARU,17 Jullu 2026 (TATOLI) – Programa Nasionál Dezenvolvimentu Suku (PNDS) 2026 iha suku Lahomea, postu administrativu Maliana, munisípiu Bobonaru, hahú implementa projetu konstrusaun estrada no dapur ba Programa Merenda Eskolár iha Eskola Bázika Sentrál Víctor Santa.
Xefe Suku Lahomea, Cirilio Mauleto, hateten katak konstrusaun dapur ba merenda eskolar to’o ona 25% , enkuantu projetu estrada regulár foin hahú durante semana ida ho progresu menus husi 15%.
“Ha’u fiar katak antes fulan ida ne’e remata, progresu estrada bele to’o 25 porsentu”, Cirilio dehan ba jornalista sira, ohin.
Tuir nia, estrada ho naruk metru 640 ne’e sei fó benefísiu direta ba uma-kain 245 tanba durante ne’e komunidade ne’ebé hela dook husi estrada públiku hasoru difikuldade atu lori sira-nia produtu agríkola bá merkadu.
“Nune’e mak ami halo planu liuhusi asembleia aldeia. Komunidade iha aldeia lima hotu fó sira-nia proposta, depois ami determina projetu ida-ne’ebé sai prioridade ba implementasaun tinan ida-ne’e. Projetu seluk sei tama iha prioridade tinan 2027”, nia informa.
Cirilio dehan katak nia kontinua halo monitorizasaun ba implementasaun projetu sira atu asegura serbisu la’o tuir planu no orsamentu ne’ebé aloka.
Nia mós konsidera PNDS hanesan programa dezenvolvimentu ne’ebé fó benefísiu direta ba povu, maibé presiza halo melhoramentu iha aspetu balun.
Notisia relevante: Governu inaugura UNP faze daruak unidade sia iha Lahomea
“Komunidade sempre hato’o preokupasaun tanba iha BoQ laiha item ba bee ne’ebé presiza ba traballadór sira durante konstrusaun. Ida-ne’e dalabarak sai obstákulu ba implementasaun projetu. Ami husu atu iha futuru item ida-ne’e inklui ona iha planeamentu orsamentu”, nia dehan.
Projetu konstrusaun estrada ne’e hetan alokasaun orsamentu hamutuk $33.600, enkuantu konstrusaun dapur merenda eskolár hetan orsamentu hamutuk rihun $14.
Notísia relevante: MAE distribui motorizada 29 ba funsionáriu PNDS Bobonaro
Jornalista: Sergio da Cruz
Editora: Maria Auxiliadora
