São Tomé e Príncipe, 17 Jullu 2026 (TATOLI) – Komandante Jerál Polísia Nasionál São Tomé no Príncipe, Superintendente Aurito Vera Cruz, asegura katak forsa seguransa prepara ona atu garante orden públiku iha períodu antes no depoizde eleisaun prezidensiál ne’ebé markada ona ba loron Domingu (19/7), inklui seguransa ba urna no akompaña prosesu to’o apuramentu rezultadu finál.
Aurito Vera Cruz hato’o deklarasaun ne’e iha marjen enkontru kortézia ho delegasaun Missaun Observasaun Eleitorál (MOE) g7+, ne’ebé lidera husi Komisáriu Komisaun Nasionál Eleisaun Libéria, Floyd Oxley Sayor, ne’ebé akompaña husi Diretór Operasionál g7+, Felix Piedade, Diretór-Jerál Sekretariadu Tékniku Administrasaun Eleitorál Timor-Leste, Elviro Moniz, no Tékniku Protokolu no Parseria Sekretariadu g7+, Elísio Valadares.
Iha reuniaun ne’e superintendente Aurito Vera Cruz hatete Polísia Nasionál iha papél importante atu garante prosesu eleisaun la’o ho dame, seguransa no respeitu ba direitu sidadaun sira atu hili sira-nia líder.
Nia hateten, preparasaun ba seguransa eleisaun hahú ona antes loron votasaun, liuhusi formasaun kona-ba seguransa eleitorál ba ofisiál polísia sira, kampaña sensibilizasaun ba komunidade no reforsu patrullamentu hamutuk ho forsa defeza.
“Ami fó ona orientasaun ba sidadaun kona-ba konduta ne’ebé di’ak antes, durante no depoizde eleisaun. Ami hakarak ema hotu bele uza sira-nia direitu atu vota ho dame no la perturba ema seluk nia direitu,”dehan dirijente polisiál.
Komandante Jerál ne’e mos hateten katak iha loron votasaun, membru Polísia Nasionál sei destaka hotu iha meza votasaun hotu-hotu, liuliu iha área sira ne’ebé konsidera sensível.
Nia esplika tan katak polísia sei akompaña distribuisaun materiál eleitorál, transporte urna sira hafoin termina votasaun, kontajen votu no apuramentu rezultadu to’o prosesu finál.
“Maske hafoin votasaun bele mosu tensaun sosiál, tanba rezultadu eleisaun, Polísia Nasionál prepara ona atu garante páz no seguransa ba sidadaun hotu to’o prosesu eleitorál termina”, nia garante.
Aurito Vera Cruz rekonhese katak sei iha limitasaun balun, hanesan falta kareta operasionál no ekipamentu sira, maibé asegura katak situasaun ne’e sei la impede polísia hala’o nia misaun.
Iha fatin hanesan, Floyd Oxley Sayor hateten katak objetivu prinsipál misaun nian iha São Tomé e Príncipe mak observa etapa hotu, hahú husi prosesu eleitorál, kampaña kandidatu sira-nian, loron votasaun, kontajen votu no anúnsiu rezultadu ikus. Ida ne’e ho objetivu atu fó kontribuisaun ba transparénsia no kredibilidade eleisaun, nomós promove demokrásia.
“Ami mai atu observa atividade hotu relasiona ho eleisaun, inklui votasaun, kontajen votu no apuramentu rezultadu. Ami hein atu akompaña prosesu ne’e to’o anúnsia rezultadu ofisiál”, dehan Floyd Oxley Sayor.
Nune’e mós Xefe Operasionál g7+, Felix Piedade, agradese ba Polísia Nasionál tanba apoiu no asisténsia ne’ebé fó ba observadór internasionál sira dezde sira to’o iha São Tomé e Príncipe.
“Ami hakarak hato’o ami-nia agradese ba apoiu di’ak ne’ebé Polísia Nasionál fó ba observadór internasionál sira. To’o agora situasaun kontroladu no ami sente seguransa atu hala’o ami-nia misaun”, dehan Felix Piedade.
MOE g7+ hela daudaun iha São Tomé e Príncipe atu observa eleisaun prezidensiál loron 19 Jullu, liuhusi akompaña etapa hotu prosesu eleitorál no halo enkontru ho instituisaun relevante sira ne’ebé responsabiliza ba organizasaun no seguransa eleisaun.
Notícia relevante: MOE g7+ hahú misaun iha São Tomé e Príncipe molok eleisaun prezidensiál
Jornalista: Afonso do Rosário
Editora: Isaura Lemos de Deus
