DILI, 18 Jullu 2026 (TATOLI) – SLB hatudu dominasiu total hafoin manán DIT ho pontuasaun finál 91-30 iha Liga Nasionál Basketeból Timor-Leste (LNBTL) kategoria Jogu Mane. Vitoria ne’e hahú kedas husi kuarter dahuluk ho lideransa makaas. Jogu ba ekipa rua hala’o iha Jináziu Dili, sábadu meiudia.
Iha kuarter dahuluk, SLB hatudu jogu ho kualidade aas tebes. Sira kontrola ritmu jogu husi hahú no loke vantajen boot hasoru DIT.
Ekipa ne’e hetan oportunidade barak husi bola perde no kontra-atake makaas. Jogadór SLB barak liu lansa ba kaixa no shoot husi distansia dook hodi hasa’e sira nia pontu ho lalais. Defensa makaas mós halo DIT susar atu marka pontu, no termina kuarter dahuluk ho 5-28.
Kuarter 2: SLB aumenta lideransa 43-11
Tama ba kuarter daruak, SLB nafatin kontrola tomak jogu no kontinua aumenta sira nia lideransa.
Sira hatudu kualidade iha atake no defensa. DIT tenta luta hodi buka pontu, maibé SLB nia presaun makaas liu halo ekipa adeversariu labele desenvolve sira nia jogu. Kuarter ne’e termina ho vantajen 43-11 ba SLB.
Kuarter 3 no 4: Jogu termina ho vitoria 91-30
Tama ba kuarter datoluk no dahaat, SLB mantein nia konsistensia. Iha kuarter 3, SLB lori pontu to’o 69-20.
Maski DIT halo esforsu hodi redus pontu, maibé diferensa ne’ebé luan liu ona difisil atu alkansa. DIT konsege hadi’a sira nia pontu iha kuarter ikus ba 30, maibé SLB nafatin dominan ho 91.
SLB kontinua ho jogu ekipamentu, pasa bola diak no finaliza ho efisiensia. Iha parte seluk, DIT konsege hatudu espíritu luta to’o minutu ikus no konsege marka pontu 30.
Ho rezultadu 91-30 ne’e, SLB konsege hadau vitoria importante iha Liga Nasionál Basketeból Mane.
Jornalista: Hortêncio Sanchez
Editor: Florencio Miranda Ximenes
